රත්මලාන ගුවන්තොටුපළේ සිට විශාල ප්‍රමාණයේ ගුවන් යානා මෙහෙයුම් කටයුතු සිදු කිරීමට හැකි වන පරිදි, පාර්ලිමේන්තු සංකීර්ණයට ඉහළින් විශාල ගුවන් යානා පියාසර කිරීම සඳහා පනවා ඇති තහනම ඉවත් කිරීමට රජය අවධානය යොමු කර ඇති බව ජනාධිපති අනුර කුමාර දිසානායක ඊයේ ප්‍රකාශ කළේය.

නියමු පුහුණු කටයුතු, දේශීය, ව්‍යාපාරික සහ කලාපීය ගුවන් ගමන් සඳහා රත්මලාන ජාත්‍යන්තර ගුවන්තොටුපළ සංවර්ධනය කිරීමේ රජයේ ප්‍රතිපත්තියට අනුකූලව මෙම පියවර ගෙන තිබේ.

“ගුවන් ගමන් ආරක්ෂාව තහවුරු කිරීම සඳහා, සීමාසහිත ගුවන්තොටුපළ සහ ගුවන් සේවා සමාගමේ අරමුදල් යටතේ රුපියල් මිලියන 6,000ක වියදමින් රත්මලාන ගුවන්තොටුපළේ දැනට පවතින ධාවන පථය පුනරුත්ථාපනය කිරීමේ සහ එය මීටර් 1,400 සිට මීටර් 1,771 දක්වා දීර්ඝ කිරීමේ ව්‍යාපෘතියක් 2027 වසරේදී ආරම්භ කරනවා,” යනුවෙන් ජනාධිපතිවරයා අනාවරණය කළේය.

මෙම අයවැය යෝජනාව ඉදිරිපත් කිරීමෙන් අනතුරුව ජනාධිපතිවරයා විපක්ෂයේ මන්ත්‍රීවරුන් සමඟ සුහද කතාබහක ද නිරත විය. විපක්ෂ මන්ත්‍රීවරුන්ගේ ඝෝෂා මධ්‍යයේ අදහස් දැක්වූ ඔහු, “පාර්ලිමේන්තු සංකීර්ණයට ඉහළින් පියාසර කිරීමේ තහනම ඉවත් නොකර රත්මලාන සංවර්ධනය කරන්න බැහැ. ඒ ගැන ඔබතුමන්ලා කලබල වෙන එකක් නැහැ කියලා මම හිතනවා. බය වෙන්න කිසිම දෙයක් නැහැ,” යනුවෙන් පැවසීය.

මේ අතර, මත්තල ගුවන්තොටුපළ සඳහා ලබන වසරේදී ආයෝජකයෙකු තෝරා ගැනීමේ සැලැස්ම පිළිබඳව ද ජනාධිපතිවරයා එහිදී ප්‍රකාශ කළේය.

“ඇමරිකානු ඩොලර් මිලියන 190ක ණය මුදලකින් ඉදිකර 2013 වසරේදී ගුවන් මෙහෙයුම් ආරම්භ කළ මත්තල ජාත්‍යන්තර ගුවන්තොටුපළ මේ වන විට රුපියල් මිලියන 70,000කට අධික සමුච්චිත අලාභයක් වාර්තා කර තිබෙනවා. එපමණක් නොව, මෙම අලාභය වාර්ෂිකව තවදුරටත් ඉහළ යනවා. එබැවින් ගුවන්තොටුපළ මෙහෙයුම්, දත්ත මධ්‍යස්ථාන, ආහාරපාන සැපයුම් සේවා සහ ගුවන් යානා සේවා හා නඩත්තු කටයුතු යන අංශ ජාත්‍යන්තර සමාගම් සමඟ ඒකාබද්ධව සංවර්ධනය කිරීම සඳහා දැනටමත් අභිලාෂ පළ කිරීම් කැඳවා අවසන් කර තිබෙනවා. තෝරාගත් සමාගම්වලින් යෝජනා කැඳවීමට මේ වන විට පියවර ගනිමින් පවතින අතර, ලබන වසර වන විට මේ සඳහා නව ආයෝජකයින් තෝරා ගැනීමට අපි අපේක්ෂා කරනවා,” යනුවෙන් වැඩිදුරටත් සඳහන් කළේය.