රාජ්‍ය අත්අඩංගුවේ පසුවන පුද්ගලයන් පහරදීම්වලට සහ වධහිංසාවලට ලක්වෙමින් මියයන බවට චෝදනා කරමින්, ඔවුන්ගේ ආරක්ෂාව සම්බන්ධයෙන් පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ ප්‍රශ්න කර සිටියි.

සිය ‘X’ ගිණුමේ සටහනක් තබමින් නාමල් රාජපක්ෂ පෙන්වාදෙන්නේ, පුද්ගලයෙකුගේ නිදහස සීමාකළ හැකි වුවද, ඔවුන්ගේ ජීවත් වීමේ අයිතිය, ගෞරවය සහ ආරක්ෂාව පිළිබඳ මූලික අයිතිවාසිකම් අහිමි කළ නොහැකි බවයි.

තම අත්අඩංගුවේ පසුවන සෑම පුද්ගලයකුගේම ජීවිතය ආරක්ෂා කිරීම රාජ්‍යයේ වගකීමක් වන අතර එය මඟහැරිය නොහැකි යුතුකමක් බව ඔහු අවධාරණය කරයි.

“අත්අඩංගුවේ සිටීම නිසා සත්‍යය කිසිසේත් නොසලකා හැරිය නොහැක: බන්ධනාගාර තාප්පවලට පිටුපසින් සිටින්නේ, ඔවුන්ගේ ආරක්ෂාව භාර දී ඇති ආයතන මත සම්පූර්ණයෙන්ම යැපෙන මනුෂ්‍යයන් ය. රාජ්‍ය අත්අඩංගුවේ සිටියදී පුද්ගලයන් පහරදීම්වලට, වධහිංසාවලට ලක්වන අතර මියයති. මේවා හුදකලා සිදුවීම් නොවේ” යනුවෙන් ඔහු පවසයි.

මීගමුව බන්ධනාගාර සිදුවීම සම්බන්ධයෙන් අදහස් දක්වමින් නාමල් රාජපක්ෂ පවසන්නේ, එම ඛේදවාචකයෙන් ජීවිත 28ක් අහිමි වූ බවයි. අධිකරණයට ඉදිරිපත් කළ වෛද්‍ය වාර්තාවලට අනුව ඉන් 17 දෙනකු වෙඩි වැදීමෙන් සහ ඉතිරි 11 දෙනා පහරදීම්වලින් සිදු වූ තුවාල හේතුවෙන් මියගොස් ඇති බව හෙළි වූ බව ද ඔහු සඳහන් කරයි.

එමෙන්ම, හෝමාගම පොලිස් අත්අඩංගුවේ සිටියදී මියගිය 29 හැවිරිදි ඉෂාර හර්ෂකුමාර සහ කුරුණෑගල කොබෙයිගනේදී මියගිය 41 හැවිරිදි පුද්ගලයාගේ සිදුවීම් ද උපුටා දක්වමින් ඔහු පවසන්නේ, මෙම සිදුවීම් මගින් රාජ්‍ය අත්අඩංගුවේ සිටින පුද්ගලයන්ට සැලකීම සහ ඔවුන්ගේ ආරක්ෂාව පිළිබඳව බරපතල ප්‍රශ්න මතුවන බවයි.

ශ්‍රී ලංකා මානව හිමිකම් කොමිෂන් සභාව ද මේ පිළිබඳව දැඩි අවධානය යොමුකරමින් ස්වාධීන පරීක්ෂණ ඉල්ලා සිටි බව නාමල් රාජපක්ෂ පෙන්වාදෙයි.

කෙසේවෙතත්, මීගමුව සිදුවීමෙන් මාස හතරකට ආසන්න කාලයක් ගතවී තිබුණද අධිකරණ වෛද්‍ය වාර්තා තවමත් ලැබී නොමැති බවත්, වින්දිතයන්ගේ පවුල් පිළිතුරු අපේක්ෂාවෙන් සිටින අතර වගවීම තවමත් විසඳී නොමැති බවත් ඔහු පෙන්වාදෙයි.

නීතියේ ආධිපත්‍යයේ වැදගත්කම අවධාරණය කරමින් ඔහු කියාසිටින්නේ, නීතිය තෝරාගත් පරිදි ක්‍රියාත්මක නොකළ යුතු අතර, දේශපාලන වාසි හෝ සම්බන්ධ පුද්ගලයන්ගේ තරාතිරම නොබලා අපක්ෂපාතීව පුද්ගල අයිතිවාසිකම් ආරක්ෂා කළ යුතු බවයි.

“පුද්ගලයෙකුගේ නිදහස සීමාවිය හැකිය, නමුත් ඔවුන්ගේ ජීවත් වීමේ අයිතිය, ගෞරවය සහ ආරක්ෂාව නැති කළ නොහැක. ප්‍රශ්නය සරලයි: සිරගෙවල් පිටුපස සිටින අයව ආරක්ෂා කරන්නේ කවුද, සහ සත්‍යය ඔවුන් සමඟ මියනොයන බවට වගබලා ගන්නේ කවුද? රාජ්‍ය අත්අඩංගුවේ සිටින සෑම ජීවිතයක්ම ආරක්ෂා කිරීම රාජ්‍යයේ වගකීමකි. එම වගකීම මඟහැරිය නොහැක” යැයි ඔහු වැඩිදුරටත් පවසයි.