2019 වසරේ සිට 2026 මාර්තු දක්වා වූ කාලය තුළ ශ්‍රී ලංකා ක්‍රිකට් (SLC) විධායක කමිටුව විදේශ සංචාර සඳහා රුපියල් මිලියන 405කට අධික මුදලක් වැයකර ඇති බව තොරතුරු දැනගැනීමේ අයිතිවාසිකම් (RTI) පනත යටතේ ලබාගත් මුල්‍ය වාර්තා ඇසුරින් ‘සන්ඩේ ටයිම්ස්’ පුවත්පත අනාවරණය කරයි. ශම්මි සිල්වාගේ වසර 7ක පාලන සමයේ සිදු වූ මෙම අධික වියදම් සම්බන්ධයෙන් මේ වන විට දැඩි කතාබහක් නිර්මාණය වී තිබේ.

අදාළ වාර්තාවලට අනුව ක්‍රිකට් නිලධාරීන් 30 දෙනකු වෙනුවෙන් මෙම මුදල් වැයකර ඇත. එහිදී දෛනික දීමනා (Per diems) සඳහා පමණක් රුපියල් මිලියන 231.47ක් වැය කර ඇති අතර, ගුවන් ටිකට්පත් සහ වීසා ගාස්තු සඳහා රුපියල් මිලියන 163.41ක් වැයකර තිබේ.

මෙය සමස්ත විදේශ සංචාරක වියදමෙන් සියයට 97කටත් වඩා වැඩි ප්‍රතිශතයකි. ඊට අමතරව නවාතැන් පහසුකම් සඳහා රුපියල් මිලියන 9.46ක් සහ වෙනත් වියදම් ලෙස රුපියල් 782,104ක් වැය වී ඇත.

අයි.සී.සී. (ICC) සහ ආසියානු ක්‍රිකට් කවුන්සිලයේ (ACC) නිල හමුවීම් මෙන්ම විදේශයන්හි පැවැති ප්‍රධාන තරඟාවලි සඳහා මෙම සංචාර සිදුකර ඇත. 2022 ඕස්ට්‍රේලියාවේ පැවැති විස්සයි-20 ලෝක කුසලානය සඳහා නිලධාරීන් 15 දෙනකුගෙන් යුත් කණ්ඩායමකට රුපියල් මිලියන 61.5ක් ද, 2022 එක්සත් අරාබි එමීර් රාජ්‍යයේ පැවැති ආසියානු කුසලානය සඳහා නිලධාරීන් 13 දෙනකුට රුපියල් මිලියන 37.7ක් ද වැයකර තිබේ.

තනි පුද්ගලයකු ලෙස වැඩිම වියදමක් දරා ඇත්තේ හිටපු සභාපති ශම්මි සිල්වා විසිනි. ඔහු වෙනුවෙන් වැයකර ඇති මුදල රුපියල් මිලියන 91.86කි. ඊට දෛනික දීමනා ලෙස රුපියල් මිලියන 45.43ක් (ඇමෙරිකානු ඩොලර් 144,725ක්) සහ ගුවන් ටිකට්පත් සඳහා රුපියල් මිලියන 43ක් ඇතුළත් වේ.

මීට අමතරව හිටපු උප සභාපති රවීන් වික්‍රමරත්න රුපියල් මිලියන 53.17ක් ද, හිටපු සහකාර ලේකම් ක්‍රිෂාන්ත කපුවත්ත රුපියල් මිලියන 35.45ක් සහ හිටපු භාණ්ඩාගාරික සුජීව ගොඩලියද්ද රුපියල් මිලියන 31.99ක් ද ලෙස විදේශ සංචාර සඳහා මුදල් ලබාගෙන ඇත.

රජයේ දැඩි බලපෑම හමුවේ ශම්මි සිල්වා ඇතුළු පාලක මණ්ඩලය ඉල්ලා අස්වීමට පෙර, 2023 සහ 2026 අතර කාලයේදී නීතිමය කටයුතු සඳහා පමණක් රුපියල් මිලියන 680කට වැඩි මුදලක් වැයකර තිබූ බවද මීට පෙර අනාවරණය විය.

අන්තර්ජාතික ක්‍රිකට් කවුන්සිලයේ රැස්වීම්වලට සහභාගී වීම ආයතනික අවශ්‍යතාවයක් වුවද, ශ්‍රී ලංකා ක්‍රිකට් ආයතනයේ මුදලින් නිලධාරීන් නැරඹීමට පමණක් විදේශ සංචාරයන්හි යෙදීම සාධාරණීකරණය කළ නොහැකි බව විචාරකයෝ පවසති. මෙම සංචාරයන් සඳහා අනුමැතිය ලබාගත් ආකාරය සහ මුදල් වෙන්කිරීම් පිළිබඳ වැඩිදුර ලේඛන පරීක්ෂා කිරීමට ඉදිරියේදී කටයුතු කරන බව පුවත්පත වැඩිදුරටත් සඳහන් කරයි.