කොළඹ විහාරමහාදේවි උද්‍යානයේ බෞද්ධ භික්ෂූන් පිරිසක් විසින් පවත්වනු ලබන සත්‍යග්‍රහය හේතුවෙන් මහජන පීඩාවක් සහ නීතිය කඩවීමක් සිදුවිය හැකි බැවින්, එම පිරිස ඉවත්කිරීමට නියෝගයක් නිකුත්කරන ලෙස ඉල්ලමින් හෙට (සඳුදා) නැවතත් අධිකරණය හෙළිදරව් කිරීමට පොලිසිය පියවර ගෙන සූදානම් වන බව දැනගන්නට ඇත.

උද්‍යානය තුළ මෙවැනි ක්‍රියාකාරකම් පැවැත්වීම සඳහා කොළඹ මහා නගර සභාවෙන් පූර්ව අවසරයක් ලබාගෙන නොමැති බවත්, සුවපහසු ලෙස කාලය ගතකිරීමට උද්‍යානයට පැමිණෙන ජනතාවට මෙයින් බාධා සිදුවන බවත් ඇතුළු කරුණු කිහිපයක් පොලිසිය විසින් අධිකරණය හමුවේ තැබීමට නියමිතය.

එසේම, මෙම සත්‍යග්‍රහය පැවැත්වෙන ස්ථානයේදී පිහි දෙකක් ළඟ තබාගෙන සිටි පුද්ගලයකු අත්අඩංගුවට ගැනීමේ සිද්ධිය (මේ වන විට අපරාධ විමර්ශන දෙපාර්තමේන්තුව මගින් පරීක්ෂණ පවත්වයි) පෙන්වාදෙමින්, මෙම විරෝධතාව තවදුරටත් පැවැත්වීමට ඉඩදුනහොත් හිංසාකාරී සිදුවීම් ඇතිවීමට ඉඩකඩ පවතින බවද පොලිසිය පෙන්වාදීමට නියමිත බව පැවැසේ.

ගලගොඩඅත්තේ ඥානසාර භික්ෂුවට ජනාධිපති සමාව ලබාදෙන ලෙස ඉල්ලා ආරම්භ කරන ලද මෙම සත්‍යග්‍රහයට ඊයේ දිනට දින නවයක් සපිරිණි.

විරෝධතාව ආරම්භ වූ තැන් පටන් විරෝධතාකරුවන් සහ පොලිසිය අතර නොසන්සුන් තත්ත්වයක් පැවැති අතර, පසුගිය සඳුදා උද්‍යාන භූමිය බලහත්කාරයෙන් අත්පත් කරගැනීම වැළැක්වීමට පොලිසිය මහේස්ත්‍රාත් අධිකරණ නියෝගයක් ලබාගත්තද, විරෝධතාකරුවන් අත්අඩංගුවට ගැනීමට වරෙන්තු නිකුත් කිරීම අධිකරණය මෙතෙක් ප්‍රතික්ෂේප කර ඇත.

“අදාළ භූමියේ රැඳී සිටින පුද්ගලයන්ගේ නම් ලැයිස්තුව හෙට අධිකරණයට ඉදිරිපත් කර අත්අඩංගුවට ගැනීමේ වරෙන්තු ලබාගැනීමට කටයුතු කරනවා,” යැයි ජ්‍යෙෂ්ඨ පොලිස් නිලධාරියෙකු ජනමාධ්‍ය වෙත පවසා ඇත.

මීට පෙර ලබාදුන් අධිකරණ නියෝගය නොසලකා හැරීම සම්බන්ධයෙන් ඔවුන්ට අධිකරණයට අපහාස කිරීමේ චෝදනා එල්ල විය හැකි බවත්, හෙටින් පසුව මෙම රැස්වීම පවත්වාගෙන යාමට ඉඩක් නොලැබෙනු ඇති බවත් හෙතෙම වැඩිදුරටත් සඳහන් කර ඇත.

මේ අතර, සත්‍යග්‍රහයේ යෙදෙන පිරිස ඉතා අල්ප වුවද, ඔවුන්ට සහයෝගය දැක්වීමට සහ දානය පිරිනැමීමට කුඩා පිරිස් පැමිණෙන අතර, උද්‍යාන භූමියේ කොටසක් මෙලෙස අත්පත් කරගැනීමට එරෙහිව කොළඹ නගර සභා කොමසාරිස්වරයා විසින් කුරුඳුවත්ත පොලිසියට පැමිණිල්ලක්ද ඉදිරිපත් කර තිබේ.