යුද්ධයේ අවසාන අදියරේදී ශ්‍රී ලංකා යුද්ධ හමුදාවට යටත් වූ දෙමළ ඊළාම් විමුක්ති කොටි (එල්.ටී.ටී.ඊ.) සාමාජිකයන් පිළිබඳ තොරතුරු හෙළිදරව් කරන ලෙස නියෝගයක් නිකුත් නොකිරීමට තොරතුරු දැනගැනීමේ අයිතිවාසිකම් කොමිෂන් සභාව (RTI) ගත් තීරණයකට එරෙහිව ගොනුකර ඇති අභියාචනාධිකරණ නඩුවකින් විනිසුරු ඩී. තොටවත්ත ඉවත් වී තිබේ.

යුද්ධයේ අවසාන අදියරේදී යටත් වූ එල්.ටී.ටී.ඊ. සාමාජිකයන් සම්බන්ධයෙන් තොරතුරු දැනගැනීමේ අයිතිවාසිකම් පනත යටතේ ජනමාධ්‍යවේදී බී. නිරෝෂ් කුමාර් විසින් ශ්‍රී ලංකා යුද්ධ හමුදාවෙන් තොරතුරු ඉල්ලා තිබුණි. හමුදාව එම තොරතුරු ලබාදීම ප්‍රතික්ෂේප කිරීමෙන් අනතුරුව, නීතිඥ ස්වස්තිකා අරුලිංගම් හරහා නිරෝෂ් කුමාර් තොරතුරු දැනගැනීමේ අයිතිවාසිකම් කොමිෂන් සභාව වෙත අභියාචනයක් ඉදිරිපත් කළේය. ව

සර කිහිපයක් පුරා පැවති විමර්ශනවලින් පසු, කොමිසම විසින් ශ්‍රී ලංකා යුද්ධ හමුදාවට පක්ෂව තීන්දු කළේය. අනතුරුව නිරෝෂ් කුමාර් එම තීරණයට එරෙහිව 2023 වසරේදී අභියාචනාධිකරණය හමුවේ නඩු පවරන ලදී.

පසුගිය නඩු වාරයේදී, මෙම නඩුව ඔක්තෝබර් 16 වැනි දින විමර්ශනයට ලක් කිරීමට අධිකරණය දින නියම කර තිබුණි. කෙසේවෙතත්, පසුගිය සිකුරාදා විනිසුරු ඩී. තොටවත්ත සහ මංජුල තිලකරත්න යන විනිසුරුවන් හමුවේ මෙම නඩුව කැඳවූ අවස්ථාවේදී, විනිසුරු තොටවත්ත ප්‍රකාශ කළේ තමා මෙම නඩුව විභාග කිරීමෙන් ඉවත් වන බවයි. ජනමාධ්‍යවේදියා වෙනුවෙන් නීතිඥ අරුලිංගම් පෙනීසිටියාය.

මෙම නඩුව විභාග කිරීම සඳහා වෙනත් විනිසුරු මඬුල්ලක් පත් කරන ලෙස අභියාචනාධිකරණයේ සභාපතිවරයාට නිර්දේශ කරන බව විනිසුරු තොටවත්ත අධිකරණයට දන්වා සිටියේය. නව විනිසුරු මඬුල්ලක් පත් කිරීමෙන් පසු, මෙම නඩුව නොවැම්බර් 10 වන දින යළි කැඳවීමට නියමිතය.