අතුරුදහන් වූ ජනමාධ්‍යවේදී ප්‍රගීත් එක්නැලිගොඩ සහ තමා අතර සමීප සබඳතාවක් පැවැති බවත්, ඒ පිළිබඳව එල්.ටී.ටී.ඊ. සංවිධානයේ ජ්‍යෙෂ්ඨ නායකයන් දැනුවත් කර තිබූ බවත් හිටපු එල්.ටී.ටී.ඊ. සාමාජිකයකු ත්‍රිපුද්ගල මහාධිකරණ විනිසුරු මඬුල්ල හමුවේ සාක්ෂි දෙමින් ඊයේ (16) ප්‍රකාශ කර තිබේ.

2010 ජනවාරි මාසයේදී මාධ්‍යවේදී ප්‍රගීත් එක්නැලිගොඩ පැහැරගෙන ගොස් අතුරුදහන් කිරීමේ සිදුවීමට අදාළ නඩුව විභාගයට ගත් අවස්ථාවේදී මෙම සාක්ෂි ලබාදී ඇත.

අධිකරණ වාර්තාවලට අනුව, ‘මුරලි’ ලෙසද හඳුන්වන සුමතිපාල සුරේෂ් කුමාර් නමැති මෙම සාක්ෂිකරු සඳහන් කර ඇත්තේ, තමා එල්.ටී.ටී.ඊ. සංවිධානයේ සාමාජිකයකුව සිටි සමයේ එක්නැලිගොඩ සමඟ සහෝදරත්වයෙන් යුත් සබඳතාවක් පවත්වාගෙන ගිය බවයි.

විත්ති පාර්ශ්වයේ නීතිඥ අසිත් සිරිවර්ධන විසින් මෙහෙයවන ලද හරස් ප්‍රශ්න කිරීම් හමුවේ සාක්ෂිකරු පවසා ඇත්තේ, තමා යුද සමයේ ලැබූ අත්දැකීම් එක්නැලිගොඩ සමඟ හුවමාරු කරගත් බවයි.

එමෙන්ම තමිල්සෙල්වම්, ඥානවේල් සහ පොට්ටු අම්මාන් ඇතුළු එල්.ටී.ටී.ඊ. ජ්‍යෙෂ්ඨ නායකයන්ටද තමන්ගේ මෙම සබඳතාව පිළිබඳව දැනුම් දී තිබූ බව ඔහු අධිකරණය හමුවේ තහවුරු කර තිබේ.

හබරණ පිහිටි ස්ථානයකදී එක්නැලිගොඩ සමඟ පැවැති සංවාදයක් සම්බන්ධයෙන් තමා මීට පෙරද ප්‍රකාශයක් කර තිබූ බව සාක්ෂිකරු මෙහිදී පිළිගෙන ඇත.

එක්නැලිගොඩ සමඟ වූ සාකච්ඡාවකදී, එවකට ජනාධිපති මහින්ද රාජපක්ෂ ගමන් ගත් ගුවන් යානයකට මිසයිල ප්‍රහාරයක් එල්ල කිරීමෙන් රටේ නායකත්වය වෙනස් කිරීමේ හැකියාව ගැන ඔහු සඳහන් කළ බව සාක්ෂිකරුගේ ආරම්භක ප්‍රකාශයේ සඳහන් වී තිබේ.

කෙසේවෙතත්, නියෝජ්‍ය සොලිසිටර් ජෙනරාල් වසන්ත පෙරේරා විසින් කරන ලද වැඩිදුර ප්‍රශ්න කිරීම් හමුවේ සාක්ෂිකරු කරුණු පැහැදිලි කරමින් පවසා ඇත්තේ, එම ප්‍රකාශය යුද්ධයෙන් පසු රටේ ඇතිවිය හැකි දේශපාලන වෙනස්කම් පිළිබඳව සිදුවූ මනඃකල්පිත සාකච්ඡාවකදී කියවුණු අදහසක් බවයි.

තමා සහ ‘නාදන්’ නැමැති තවත් පුද්ගලයකු යුද්ධයෙන් පසුව සාමකාමීව ජීවත් වීම ගැන කතාකරමින් සිටි බවත්, එහිදී යුද්ධය අවසන් වුවද රටේ ප්‍රධාන ප්‍රශ්න විසඳී නොමැති බව එක්නැලිගොඩ පැවසූ බවත් සාක්ෂිකරු පවසා තිබේ.

එහිදී ආණ්ඩුව තවත් වසර 20ක් බලයේ සිටිනු ඇතැයි අනෙක් පිරිස පැවසූ අවස්ථාවේදී, දේශපාලන තත්ත්වයන් කෙතරම් වේගයෙන් වෙනස් විය හැකිද යන්න පැහැදිලි කිරීමට උදාහරණයක් ලෙස ජනාධිපතිවරයාගේ ගුවන් යානයට මිසයිල ප්‍රහාරයක් එල්ල කිරීමේ සිදුවීම එක්නැලිගොඩ පෙන්වාදුන් බව සාක්ෂිකරු වැඩිදුරටත් අධිකරණයට පවසා ඇත.