ශ්‍රී ලංකාවේ සිටි විශාලතම සහ උසම වනජීවී දළ ඇතෙකු වූ ‘කාවන්තිස්ස’ගේ මරණයට හේතුව සෙවීම සඳහා පශ්චාත් මරණ පරීක්ෂණයක් පැවැත්වීමට වනජීවී සංරක්ෂණ දෙපාර්තමේන්තුව සෙනසුරාදා (ඔක්තෝබර් 17) අධිකරණ නියෝගයක් ලබාගැනීමට නියමිතය.

වාර්තාවලට අනුව, පේරාදෙණිය විශ්වවිද්‍යාලයේ විශේෂඥයන් ඇතුළු කණ්ඩායමක් විසින් ඇතාගේ මරණයට නිශ්චිත හේතුව තීරණය කිරීම සඳහා දේහය පරීක්ෂා කරනු ඇත.

බරපතල තුවක්කු ප්‍රහාරයකින් සිදුවූ තුවාල සඳහා ප්‍රතිකාර ලබමින් සිටි කාවන්තිස්ස ඇතා සිකුරාදා (ඔක්තෝබර් 16) මියගියේය.

පෙර දින ප්‍රතිකාර ලැබූ ස්ථානයේ සිට කිලෝමීටර දෙකක් පමණ දුරින් පිහිටි සියඹලංගමුව වනජීවී කලාපයේ කුඹුරක වැටී සිටියදී සිකුරාදා උදෑසන මෙම දළ ඇතා සොයාගන්නා ලදී.

වනජීවී සංරක්ෂණ දෙපාර්තමේන්තුවේ විශේෂඥ පශු වෛද්‍ය කණ්ඩායම් ඇතාගේ ජීවිතය බේරාගැනීම සඳහා විසිහතර පැය පුරා ප්‍රතිකාර ලබාදෙමින් සිටියහ.

හස්තියාගේ දකුණු ඉදිරිපස කකුලේ තිබූ තුවක්කු තුවාලය සුවවන ලකුණු පෙන්නුම් කළද, ආහාර ගැනීම නැවැත්වීමෙන් පසු ඇතිවූ විජලනය හේතුවෙන් ඇතාගේ තත්ත්වය අයහපත් වූ බව පැවසේ.