මත්ද්‍රව්‍ය ජාවාරමෙන් උපයාගත් මුදල් යොදාගනිමින් මිලදී ගෙන ඇති බවට සැක කෙරෙන දළ වශයෙන් රුපියල් මිලියන 22ක් පමණ වටිනා සුඛෝපභෝගී BMW වර්ගයේ මෝටර් රථයක් තහනම් කරමින් පොලිසිය විසින් නියෝගයක් නිකුත් කර තිබේ.

පොලිසිය පවසන්නේ, මත්ද්‍රව්‍ය ජාවාරම් සම්බන්ධයෙන් මීගමුව ප්‍රදේශයේදී අත්අඩංගුවට ගත් සැකකරුවකු විසින්, නීතිවිරෝධී මත්ද්‍රව්‍ය ජාවාරම්වලින් උපයාගත් මුදල් යොදාගනිමින් සිය පුත්‍රයාගේ නමින් මෙම වත්කම් මිලදී ගෙන ඇති බව විමර්ශනවලදී අනාවරණය වී ඇත.

මත්ද්‍රව්‍ය ජාවාරම් මගින් උපයා ගන්නා මුදල් භාවිත කරමින් සැකකරු විසින් මෙම දේපළ අත්පත් කරගෙන ඇති බවට ලද තොරතුරක් මත නීතිවිරෝධී වත්කම් විමර්ශන කොට්ඨාසය විසින් විමර්ශනයක් ආරම්භ කර තිබේ.

මෙම විමර්ශනයේ කොටසක් ලෙස, මුදල් විශුද්ධිකරණ පනත යටතේ ඔක්තෝබර් 13 වැනි දින සිට ක්‍රියාත්මක වන පරිදි අදාළ BMW මෝටර් රථය මත දින 14ක තහනම් නියෝගයක් බලධාරීන් විසින් නිකුත් කර ඇත.

මෙම නියෝගය මඟින් අදාළ කාල සීමාව තුළ වාහනය විකිණීම, පැවරීම හෝ වෙනත් ඕනෑම ගනුදෙනුවක් සිදුකිරීම වළක්වනු ලැබේ.

එම මුදල් උපයා ගත් ආකාරය තීරණය කිරීමට සහ සැක සහිත නීතිවිරෝධී වත්කම් පරීක්ෂා කිරීම සඳහා වැඩිදුර විමර්ශන ක්‍රියාත්මක බව ද පොලිසිය පවසයි.