පාස්කු ඉරිදා ත්‍රස්ත ප්‍රහාරය පිළිබඳ පූර්ව තොරතුරු ශ්‍රී ලංකා හමුදා සහ රාජ්‍ය බුද්ධි අංශවල ඇතැම් කොටස් සතුව පැවති නමුත් එම තොරතුරු අනෙකුත් ආරක්ෂක අංශ වෙත ලබාදීමට අදාළ අංශ අසමත් වී ඇති බවට තොරතුරු විමර්ශනවලදී අනාවරණය වී ඇති බව අපරාධ විමර්ශන දෙපාර්තමේන්තුව කොළඹ කොටුව මහේස්ත්‍රාත් අධිකරණයට දැනුම් දී තිබේ.

රාජ්‍ය බුද්ධි සේවයේ හිටපු අධ්‍යක්ෂ මේජර් ජෙනරාල් සුරේෂ් සලේ ඇතුළු පාස්කු ප්‍රහාරයට සම්බන්ධ සැකකරුවන්ට අදාළ නඩුව කොටුව මහේස්ත්‍රාත් පසන් අමරසේන හමුවේ කැඳවූ අවස්ථාවේදී මෙම කරුණු අනාවරණය කෙරිණි.

පැමිණිල්ල වෙනුවෙන් පෙනීසිටි අතිරේක සොලිසිටර් ජෙනරාල් දිලීප පීරිස් කියාසිටියේ, ප්‍රහාරයට සම්බන්ධ අන්තවාදීන් පිළිබඳව අනතුරු ඇඟවීම් ලැබී තිබියදීත් හමුදා බුද්ධි අංශ අභ්‍යන්තරයේ සිටි යම් පුද්ගලයන් හිතාමතාම එම තොරතුරු සඟවා තබා ගත්තේ ද යන්න පිළිබඳව විමර්ශකයින් පරීක්ෂා කරමින් සිටින බවයි.

වවුනියාවේ පළමු හමුදා බුද්ධි බලකාය වෙත තොරතුරු සැපයූ බුද්ධි තොරතුරු මූලාශ්‍රයකගෙන් විමර්ශකයන් ප්‍රකාශයක් සටහන් කරගෙන ඇති බව දිලීප පීරිස් අධිකරණයට පැවසීය. පැමිණිල්ලට අනුව, අදාළ තොරතුරුකරු 2014 වසරේ සිට අන්තවාදීන් පිළිබඳව තොරතුරු සපයා ඇති අතර, පාස්කු ප්‍රහාරයට පෙර දින ද විශේෂිත තොරතුරු ලබා දී තිබේ. කෙසේවෙතත්, එම තොරතුරු අනෙකුත් ආරක්ෂක අංශ වෙත දැනුම් දී නොමැති බවට දිලීප පීරිස් චෝදනා කළේය.

“පාස්කු ඉරිදා ත්‍රස්ත ප්‍රහාරය සිදුවන බවට පූර්ව දැනුමක් තිබියදීත්, හමුදා බුද්ධි අංශය හිතාමතාම එය සිදුවීමට ඉඩ හැර ඇති බවට තොරතුරු මතුව තිබෙනවා” යනුවෙන් නඩු වාරයේදී කරුණු දක්වමින් දිලීප පීරිස් පැවසීය. හමුදා බුද්ධි අංශය තුළ සිටි සංවිධානාත්මක කණ්ඩායමක් පාස්කු ප්‍රහාරයේ මහමොළකරු වූ සහරාන් හෂීම් ආරක්ෂා කිරීමටත්, ඒ හරහා ප්‍රහාරය පිටුපස සිටි සැබෑ වගකිවයුත්තන් ආරක්ෂා කිරීමටත් උත්සාහ කර ඇති බවට ද ඔහු වැඩිදුරටත් චෝදනා කළේය.

මීට පෙර වවුනතිව් හි සිදුවූ ප්‍රහාරය සම්බන්ධයෙන් කෙරෙන විමර්ශන පිළිබඳව ද පැමිණිල්ල මෙහිදී සඳහන් කළේය. අප්‍රේල් 12 වැනිදා ගිරිතලේ බුද්ධි කඳවුරේ නිලධාරියකු විසින් සහරාන් ඊට වගකිව යුතු බවට ලිඛිතව දැනුම් දී තිබියදීත්, හමුදා බුද්ධි අංශය මුලින් එම ප්‍රහාරය හිටපු එල්.ටී.ටී.ඊ. සාමාජිකයකු පිට පැටවීමට කටයුතු කර ඇති බව දිලීප පීරිස් පැවසීය. මෙලෙස තොරතුරු වසන් කළ නිලධාරීන් සුරේෂ් සලේට සම්බන්ධ නිලධාරීන් බවට ද ඔහු චෝදනා කළේය.

හිටපු අමාත්‍ය රිෂාඩ් බදියුදීන් සහ මන්නාරමේ ව්‍යාපාරිකයකු වන අලව්දීන් යන අය පිළිබඳව ද සඳහන් කළ පැමිණිල්ල, ප්‍රහාරකයන්ට සම්බන්ධ පුද්ගලයන්ට දේශපාලන සහ සැපැයුම් සහාය ලබා දී තිබේද යන්න විමර්ශකයන් පරීක්ෂා කරමින් සිටින බව පැවසීය. අලව්දීන් යනු ෂැංග්‍රි-ලා බෝම්බකරු වූ ඉන්ෂාෆ් අහමඩ්ගේ මාමණ්ඩිය බවත්, ප්‍රහාරයට පෙර සහරාන් ඇතුළු පිරිස ඉන්දියාවට යෑම සඳහා මෙම ව්‍යාපාරිකයාට අයත් වේගවත් යාත්‍රා (Speedboats) භාවිත කර ඇති බවත් දිලීප පීරිස් පැවසීය. හිටපු ජනාධිපති ගෝඨාභය රාජපක්ෂගේ පාලන සමයේදී රැඳවුම් නියෝග යටතේ තබාගෙන සිටි, ඉන්ෂාෆ් අහමඩ් සමඟ විවාහ වී සිටි අලව්දීන්ගේ දියණිය නිදහස් කර ඇති බවට ද ඔහු වැඩිදුරටත් චෝදනා කළේය.

ප්‍රහාරය පිටුපස සිටි පුද්ගලයන් ආරක්ෂා කළ බවට මීට පෙර පාර්ලිමේන්තුවේදී චෝදනා කළ විපක්ෂයේ දේශපාලනඥයන්ගෙන් ද ප්‍රකාශ සටහන් කර ගැනීමට විමර්ශකයන් අපේක්ෂා කරන බව පැමිණිල්ල පැවසීය.

ප්‍රහාරයට පෙර රාජ්‍ය බුද්ධි සේවය සතුව පැවති බව කියන තොරතුරු පිළිබඳව ද දිලීප පීරිස් කරුණු දැක්වීය. ප්‍රහාරයට පෙර එවකට රාජ්‍ය බුද්ධි සේවයේ නිලධාරියකුව සිටි පොලිස් පරීක්ෂක රංජන් සෙනරත් බණ්ඩාර විසින් අන්තවාදීන් 94 දෙනෙකුගේ නම් ඇතුළත් ලැයිස්තුවක් එවකට රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධන වෙත යවා තිබූ බව ඔහු පැවසීය. එම ලැයිස්තුවට සහරාන්, රිල්වාන් සහ දැනට පාස්කු ප්‍රහාර නඩුවේ චෝදනා ලබා සිටින පුද්ගලයන් ඇතුළත් වී තිබූ බව සඳහන් වේ. පැමිණිල්ලට අනුව, නිලන්ත ජයවර්ධන නිලධාරීන්ට උපදෙස් දී ඇත්තේ ඒ පිළිබඳ වැඩිදුර පරීක්ෂණ පවත්වන ලෙසයි.

හමුදා බුද්ධි අංශයේ මෙන්ම රාජ්‍ය බුද්ධි සේවයේ ද ඇතැම් කණ්ඩායම් මෙම අන්තවාදීන් පිළිබඳව දැන සිටියද එම තොරතුරු මත නිසියාකාරව කටයුතු කිරීමට අපොහොසත් වී ඇති බවට විමර්ශනවලදී සලකුණු අනාවරණය වී ඇති බව දිලීප පීරිස් තර්ක කළේය.

පාස්කු ඉරිදා ප්‍රහාරයෙන් දින කිහිපයකට පසු, 2019 අප්‍රේල් 26 වැනි දින සයින්දමරුදු හි සිදුවූ සිදුවීම් පිළිබඳව ද CIDය විමර්ශනය කරයි. එහිදී මියගිය සෑමදෙනාම මිය යා යුතුමද යන්න සහ ප්‍රහාරය පිළිබඳ තොරතුරු ලබාගත හැකි පරිදි පුද්ගලයන් ජීවග්‍රහයෙන් ගැනීමට ඉඩනොදෙන ලෙස හමුදා සාමාජිකයන් හිතාමතා කටයුතු කළේද යන්න පිළිබඳව විමර්ශකයින් පරීක්ෂා කරමින් සිටින බවද දිලීප පීරිස් අධිකරණයට පැවසීය.

සාක්ෂි තිබේ නම් කරුණු දැක්වීමේදී නම් කරන ලද බුද්ධි නිලධාරීන් අත්අඩංගුවට නොගත්තේ මන්දැයි මහේස්ත්‍රාත්වරයා ප්‍රශ්න කළේය. ගිරිතලේ කඳවුර භාරව සිටි නිලධාරියකු අත්අඩංගුවට ගැනීමට එරෙහිව නීතිමය පියවර ගෙන ඇති බවත්, එම කරුණ අධිකරණය හමුවේ පවතින බැවින් විමර්ශකයන් පියවර ගැනීමෙන් වළකින බවත් දිලීප පීරිස් ඊට පිළිතුරු දෙමින් පැවසීය.

මේ අතර, සුරේෂ් සලේ දිගින් දිගටම රෝහල්ගතව සිටීම සම්බන්ධයෙන් ද පැමිණිල්ල කරුණු මතුකළේය. ජූනි 7 වැනිදා සිට සලේ දින 100 කට ආසන්න කාලයක් වෛද්‍ය නිවාඩු ලබා සිටින බව පැවසූ දිලීප පීරිස්, මෙම තත්ත්වය විමර්ශනයට බාධා කිරීමට සහ අනෙක් අය ආරක්ෂා කිරීමට යොදාගන්නා බවට චෝදනා කළේය. ජාතික රෝහලේ අධ්‍යක්ෂවරයාගෙන් අධිකරණය මීට පෙර ඉල්ලා සිටි වෛද්‍ය වාර්තා මෙතෙක් ඉදිරිපත් නොකළේ මන්දැයි ඔහු ප්‍රශ්න කළේය. වෛද්‍ය වාර්තා මෙතෙක් ලැබී නොමැති බව මහේස්ත්‍රාත්වරයා පැවසීය.

සලේ වෙනුවෙන් පෙනීසිටි ජනාධිපති නීතිඥ ෂාවින්ද්‍ර ප්‍රනාන්දු පැමිණිල්ලේ චෝදනා ප්‍රතික්ෂේප කරමින් කියාසිටියේ, බී වාර්තාවල අඩංගු ප්‍රකාශ සාක්ෂි ලෙස සැලකිය නොහැකි බවයි. තමාගේ සේවාදායකයාගේ වෛද්‍ය තත්ත්වය සම්බන්ධයෙන් එල්ල වන විවේචන ද ප්‍රතික්ෂේප කළ ඔහු, නිසි ක්‍රියාපටිපාටිය ඔස්සේ අදාළ වෛද්‍ය වාර්තා ලබාගන්නා ලෙස අධිකරණයෙන් ඉල්ලා සිටියේය.

කරුණු ඉදිරිපත් කිරීමෙන් අනතුරුව, සුරේෂ් සලේට අදාළ වෛද්‍ය වාර්තා ලබානොදීමට හේතු පැහැදිලි කිරීම සඳහා ඊළඟ නඩු වාරයේදී අධිකරණය හමුවේ පෙනීසිටින ලෙසත්, අදාළ වාර්තා ඉදිරිපත් කරන ලෙසත් දන්වමින් මහේස්ත්‍රාත් අමරසේන ජාතික රෝහලේ අධ්‍යක්ෂවරයාට නොතීසි නිකුත් කළේය.

නඩුව නැවත සැප්තැම්බර් 22 වැනිදා කැඳවීමට නියමිතය.