අනුරාධපුරයේ පැවැති ශ්‍රී ලංකා පොදුජන පෙරමුණේ රැලියේදී තහනම් කර ඇති දෙමළ ඊළාම් විමුක්ති කොටි (LTTE) සංවිධානය ප්‍රවර්ධනය කළ බවට එල්ල වී ඇති චෝදනා සම්බන්ධයෙන් විමර්ශනය කරන ලෙස ත්‍රස්ත විමර්ශන කොට්ඨාසයට (TID) උපදෙස් දී ඇති බව වාර්තා වේ.

රැලිය අතරතුර කරන ලද ප්‍රකාශ සම්බන්ධයෙන් ලැබුණු පැමිණිල්ලක් මත පදනම්ව පොලිස්පතිවරයා විසින් මෙම නියෝගය නිකුත් කර ඇති බව සඳහන් වේ.

රැලියේදී සිදුකරන ලද ප්‍රකාශ මගින් එල්.ටී.ටී.ඊ. සංවිධානය ප්‍රවර්ධනය කිරීම හෝ ඊට සහාය දැක්වීම සිදු වූ බවට චෝදනා කරමින් සිවිල් සමාජ ක්‍රියාකාරීන් පිරිසක් විසින් අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර ඇති බව පොලිසිය මීට පෙර තහවුරු කළේය.

සැප්තැම්බර් 12 වැනිදා අනුරාධපුර මහා නගර සභා ක්‍රීඩාංගණයේ පැවැති ශ්‍රී ලංකා පොදුජන පෙරමුණේ රැලිය අමතමින් යාපනය දිස්ත්‍රික් පාර්ලිමේන්තු මන්ත්‍රී රාමනාදන් අර්ච්චුනා කළ ප්‍රකාශයක් මුල්කරගනිමින් මෙම ආන්දෝලනාත්මක තත්ත්වය හටගෙන තිබේ.

ජනාධිපති අනුරාධ කුමාර දිසානායක සම්බන්ධ කරගනිමින් දේශපාලන සැසඳීමක් සිදුකරන අතරතුර, අර්ච්චුනා මන්ත්‍රීවරයා තමන්ව ‘කොටියකු’ ලෙස හඳුන්වාදුන්නේය.

හිටපු ජනාධිපති මහින්ද රාජපක්ෂ, හිටපු අමාත්‍යවරුන් සහ පාර්ලිමේන්තු මන්ත්‍රීවරුන් ඇතුළු විපක්ෂයේ දේශපාලනඥයන් රැසක් මෙම රැලියට එක්ව සිටියහ.

එල්.ටී.ටී.ඊ. සංවිධානය ශ්‍රී ලංකාව තුළ තහනම් කරන ලද සංවිධානයක් ලෙස තවදුරටත් පවතී.