September 15, 2026
ශ්රී පාදස්ථාන කඳුවැටියේ බස්නාහිර බැවුම් ප්රදේශවලට පසුගිය දිනවල ඇදහැලුණු අධික වර්ෂාවත් සමඟ ශ්රී පාදස්ථානයේ එකතු වී තිබූ දැවැන්ත කසළ කන්දක් මාර්ගය දෙසට කඩා වැටී තිබේ.
පළමුව මෙය ස්වාභාවික නායයෑමක් ලෙස හැඟී ගියද, එය ශ්රී පාද වන්දනාවේ පැමිණි බැතිමතුන් විසින් පරිසරයට මුදාහැර තිබූ ප්ලාස්ටික් බෝතල්, පොලිතින් බෑග් ඇතුළු කසළ ගොඩක් වැස්සට සෝදාගෙන ඒම නිසා සිදුවූවක් බව පොලිසිය තහවුරු කළේය.
හැටන් ජ්යෙෂ්ඨ පොලිස් අධිකාරී ප්රදීප් වීරසේකර පෙන්වා දෙන්නේ, සෑම වසරකම ශ්රී පාද වන්දනා වාරය ආරම්භයේදී ශ්රී පාදස්ථානාධිපති නායක හිමිපාණන් වහන්සේ ඇතුළු වගකිවයුතු නිලධාරීන් ප්ලාස්ටික් සහ පොලිතින් ශ්රී පාද අඩවියට නොගෙනෙන ලෙස ඉල්ලා සිටියද, බොහෝ පිරිස් තවමත් එම උපදෙස් තැකීමක් නොකරන බවයි.
පාරට කඩාවැටී ඇති මෙම කසළ කන්ද ඉවත් කිරීම සඳහා ආරක්ෂක අංශ සහ පොලිසිය එක්ව ඉදිරියේදී විශේෂ ශ්රමදාන මෙහෙයුමක් දියත් කිරීමට නියමිතය.
පූජනීය ශ්රී පාදස්ථානය සහ සමනල අඩවියේ සුන්දර පරිසරය ආරක්ෂා කරගැනීම සෑම ශ්රී ලාංකිකයකුගේම වගකීමක් බවත්, මින් ඉදිරියට ශ්රී පාදස්ථානයට ප්ලාස්ටික් බෝතල් සහ පොලිතින් රැගෙන ඒමෙන් වළකින ලෙසත් ජ්යෙෂ්ඨ පොලිස් අධිකාරීවරයා බැතිමතුන්ගෙන් දැඩි ලෙස ඉල්ලා සිටියි.
