විනිසුරුවන්ගේ විශ්‍රාම යෑමේ වයස් සීමාව දීර්ඝ කිරීමේ යෝජනාව, මානව හිමිකම් සහ දේශීය සංහිඳියාව, දූෂණ විරෝධී ක්‍රියාමාර්ග සහ වත්මන් ආර්ථික තත්ත්වය ඇතුළු කරුණු ගණනාවක් සම්බන්ධයෙන් කොළඹ සිටින විදේශීය තානාපතිවරුන් දැනුවත් කිරීමට රජය පියවර ගෙන තිබේ.

විදේශ කටයුතු අමාත්‍ය විජිත හේරත්, අධිකරණ අමාත්‍ය හර්ෂණ නානායක්කාර සහ මහබැංකු අධිපති ආචාර්ය නන්දලාල් වීරසිංහ ඇතුළු ජ්‍යෙෂ්ඨ නිලධාරීන් විසින් මෙම දැනුවත් කිරීම සිදුකර ඇත.

සැප්තැම්බර් 7 වැනි දින ආරම්භ වීමට නියමිත එක්සත් ජාතීන්ගේ මානව හිමිකම් කවුන්සිල සැසිවාරයට පෙර සහ විනිසුරුවන්ගේ විශ්‍රාම යෑමේ වයස දීර්ඝ කිරීමට එරෙහිව විපක්ෂය විසින් තානාපතිවරුන් අතර ගෙන යන ප්‍රචාරණ ව්‍යාපාරය හමුවේ සඳුදා දිනයේදී මෙම සාකච්ඡාව පවත්වා තිබේ.

ත්‍රස්තවාදය වැළැක්වීමේ පනත අහෝසි කර නව ත්‍රස්ත විරෝධී පනත ගැසට් කිරීම සහ අන්තර්ජාල සුරක්ෂිතතා පනතේ සංශෝධන අවසන් කිරීම ඇතුළු නීතිමය ප්‍රතිසංස්කරණ කිහිපයක් ඉදිරි මාසවලදී අවසන් කිරීමට රජය සැලසුම් කර ඇති බව තානාපතිවරුන්ට දන්වා ඇත. විනිසුරුවන්ගේ විශ්‍රාම යෑමේ වයස දීර්ඝ කිරීම අරමුණු කරගත් 22 වැනි ආණ්ඩුක්‍රම ව්‍යවස්ථා සංශෝධනය හඳුන්වා දීමේ අවශ්‍යතාව පිළිබඳව ද මෙහිදී පැහැදිලි කර තිබේ.

ආර්ථික ක්ෂේත්‍රය පිළිබඳව අදහස් දක්වමින්, 2028 වසරේ සිට සිය ණය ආපසු ගෙවීමේ වගකීම් ඉටුකිරීමට ශ්‍රී ලංකාවට හැකියාව පවතින බවට රජය තුළ පූර්ණ විශ්වාසයක් පවතින බව තානාපතිවරුන්ට ප්‍රකාශ කර ඇත.

අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයා විසින් ජාතික දූෂණ විරෝධී ක්‍රියාකාරී සැලැස්ම ආරම්භ කිරීම සහ විමර්ශනවල ප්‍රගතිය පිළිබඳව රාජ්‍ය තාන්ත්‍රිකයන් දැනුවත් කර තිබේ. එමෙන්ම 2028 දෙසැම්බර් වන විට ශ්‍රී ලංකාව යුරෝපා සංගමයේ GSP+ සහනය සඳහා නැවත අයැදුම් කරන බවත්, ඊට පෙර පවතින සියලු ගැටලු විසඳීමට රජය බලාපොරොත්තු වන බවත් දන්වා තිබේ.

සංවිධානාත්මක අපරාධකරුවන්ට එරෙහිව ක්‍රියාත්මක වන මෙහෙයුම් සහ විදේශයන්හිදී අත්අඩංගුවට ගත් අපරාධකරුවන් නැවත ගෙන්වා ගැනීමට ලැබුණු සහයෝගය අගය කරමින් පොලිස්පති ප්‍රියන්ත වීරසූරිය ද කරුණු පැහැදිලි කර ඇත. පාස්කු ඉරිදා ප්‍රහාරය පිළිබඳ විමර්ශනවල නවතම තත්ත්වය මෙන්ම කිසිදු වාර්ගික හෝ ආගමික හිංසනයක් සිදු වීමට ඉඩ නොතබා පාලනය කිරීමට රජයට හැකි වූ බව ද මෙහිදී වැඩිදුරටත් අවධාරණය කර තිබේ.