රාජ්‍ය හිමිකාරීත්වය සහිත මිල්කෝ (පෞද්ගලික) සමාගම 2025 අගභාගය වන විට රුපියල් බිලියන 1.49ක (කෝටි 149ක) සාධනීය ශුද්ධ ලාභයක් වාර්තා කරමින් ඓතිහාසික මූල්‍ය පෙරළියක් සිදුකර ඇති බව කෘෂිකර්ම හා පශු සම්පත් නියෝජ්‍ය අමාත්‍ය නාමල් කරුණාරත්න පවසයි.

පාර්ලිමේන්තුව ඇමතූ නියෝජ්‍ය අමාත්‍ය කරුණාරත්න කියාසිටියේ, මෙම මූල්‍ය වර්ධනයත් සමඟ සමාගම පෞද්ගලීකරණය කිරීමේ සැලසුම් අත්හිටුවීමටත්, ණය සම්පූර්ණයෙන්ම පියවීමටත්, සේවකයන්ට හා ගොවීන්ට නියමිත මූල්‍ය ප්‍රතිලාභ ලබාදීමටත් හැකි වූ බවයි.

ඒ අනුව, 2025 දෙසැම්බර් 31 වන දින, මිල්කෝ සමාගමේ සේවකයින් 1,228 දෙනා සඳහා රුපියල් 75,000 බැගින් වූ කාර්යසාධන ප්‍රසාද දීමනාවක් (Bonus) ලබා දී ඇත. ඊට අමතරව, වසර 21 කට පසුව ප්‍රථම වතාවට, රුපියල් මිලියන 180 ක ලාභාංශ දීමනාවක් කිරි ගොවීන් 22,000 ක් අතර බෙදාහැරීමට ද කටයුතු කර තිබේ.

මීට පෙර මිල්කෝ සමාගම විසින් ලබාගෙන තිබූ රුපියල් බිලියන 3.5ක බැංකු ණය සහ කිරි සැපයුම්කාර ගොවීන්ට ගෙවීමට තිබූ රුපියල් බිලියන 1.7ක හිඟ මුදල් සම්පූර්ණයෙන්ම ගෙවා දමා ඇති බවද අමාත්‍යවරයා වැඩිදුරටත් සඳහන් කළේය.

එමෙන්ම, දීර්ඝ කාලයක් තිස්සේ ප්‍රමාද වී තිබූ බදල්ගම කිරි කර්මාන්තශාලා ව්‍යාපෘතිය දිනකට කිරි ලීටර් 200,000ක් සකස් කිරීමේ ධාරිතාවයෙන් යුතුව නැවත ආරම්භ කරන බවද ඔහු නිවේදනය කළේය.

මීට අමතරව, නිකවැරටිය ජාතික පශු සම්පත් සංවර්ධන මණ්ඩලයේ ගොවිපළ ශ්‍රේණිගත කර යාවත්කාලීන කිරීමට සැලසුම් කර ඇති අතර, දේශීය ගොවීන්ට ඉහළ අස්වැන්නක් ලබාදෙන දෙනුන් සහ බෝ අභිජනන සතුන් ලබාදීම සඳහා රුපියල් බිලියන 1ක අමතර අයවැයක් ද වෙන්කර ඇත.