2025 වසරට සාපේක්ෂව 2026 දී සිංහල සහ දෙමළ අලුත් අවුරුද්ද සඳහා සාම්ප්‍රදායික කැවිලි මේසයක් සකස් කිරීමේ පිරිවැය 7%කින් ඉහළ ගොස් ඇති බව වෙරිටේ රිසර්ච් විසින් ප්‍රකාශයට පත් කරන ලද විශ්ලේෂණයකින් අනාවරණ වී තිබේ.

කොවිඩ් වසංගතය සහ ආර්ථික අර්බුදයට පෙර, 2019 වසරට සාපේක්ෂව පිරිවැය 2.5 ගුණයකින් ඉහළ ගොස් ඇති බව එහි PublicFinance.lk වේදිකාවේ නිකුත් කරන ලද අධ්‍යයනයෙන් හෙළි වේ.

කැවිලි මේසයක සාමාන්‍යයෙන් ඇතුළත් කර ඇති අයිතම අටෙන් හයක් සඳහා මිල ඉහළ ගොස් ඇති බවත් 2026 වසරේ වැඩිවීමෙන් 80%කට ආසන්න ප්‍රමාණයක් පොල්තෙල් සහ සහල් පිටි මිල ඉහළ යෑම නිසා සිදුව ඇති බවත් පෙනීයයි.

සාම්ප්‍රදායික කැවිලි මේසයකට කිරිබත්, කොකිස්, කෙසෙල්, අලුවා, කැවුම්, දොදොල්, මුං කැවුම් සහ බටර් කේක් වැනි අයිතම ඇතුළත් වන අතර එය අලුත් අවුරුද්ද තුළ සමෘද්ධිය සහ සැමරුම සංකේතවත් කරයි.

‘අප්පේ අම්මා’ යූ ටියුබ් නාලිකාව විසින් පුද්ගලයන් හතර දෙනෙකුගෙන් යුත් පවුලක් සඳහා සකස්කළ වට්ටෝරුවලින් ලබාගත් අමුද්‍රව්‍ය ප්‍රමාණයන් මත අදාළ විශ්ලේෂණය පදනම් වී ඇත.

2019 අප්‍රේල්, 2025 මාර්තු සහ 2026 මාර්තු සඳහා කොළඹ දිස්ත්‍රික්කයේ විවෘත වෙළඳපොළේ සතිපතා සාමාන්‍ය සිල්ලර මිල ගණන් භාවිත කරමින්, මිල දත්ත ජනලේඛන හා සංඛ්‍යාලේඛන දෙපාර්තමේන්තුවෙන් ලබා ගෙන තිබේ.