විදුලි ඉල්ලුම ඉහළ යාමත් සමඟ ඊසානදිග අරුණාචල් ප්‍රදේශ් ප්‍රාන්තයේ බ්‍රහ්මපුත්‍ර නදිය ආශ්‍රිතව ජල විදුලි ව්‍යාපෘති දෙකක් ඉදිකිරීම සඳහා ඩොලර් බිලියන 4කට අධික ආයෝජනයක් ඉන්දියාව අනුමත කර ඇති බව රජය ප්‍රකාශ කළේය.

යෝජිත මෙගාවොට් 1720 ක ධාරිතාවයකින් යුත් කමලා (Kamala) ව්‍යාපෘතියේ වටිනාකම ඉන්දීය රුපියල් බිලියන 260.7 ක් (ඩොලර් බිලියන 2.83) වන අතර, එය NHPC සමාගම සහ අරුණාචල් ප්‍රදේශ් රජය අතර හවුල් ව්‍යාපාරයකි.

මුළු පිරිවැය රුපියල් බිලියන 141.06 ක් වන මෙගාවොට් 1200 ක කලයි-II (Kalai-II) ව්‍යාපෘතිය, THDC ඉන්දියා සමාගම සහ ප්‍රාදේශීය රජය අතර හවුල් ව්‍යාපාරයකි.

මෙම ව්‍යාපෘති වසර හයක සිට අටක් ඇතුළත නිම කිරීමට නවදිල්ලිය අපේක්ෂා කරයි.

ටිබෙටයෙන් ආරම්භ වී ඉන්දියාව සහ බංග්ලාදේශය හරහා ගලා යන බ්‍රහ්මපුත්‍ර නදිය, එහි ඉන්දීය කොටස තුළ, විශේෂයෙන්ම චීන දේශසීමාවේ පිහිටි අරුණාචල් ප්‍රදේශ්හි විශාල ජල විදුලි විභවයක් දරයි.

මෙම ගංගා ද්‍රෝණියේ දේශසීමා හරහා ගලා යන ස්වභාවය සහ චීනයට ඇති සමීප බව හේතුවෙන් ජල කළමනාකරණය සහ යටිතල පහසුකම් සැලසුම් කිරීම උපායමාර්ගික වශයෙන් වැදගත් වේ.

යාලුන්ග් සැන්ග්බෝ (Yarlung Zangbo) නදියේ ඉහළ ප්‍රදේශයේ චීනය ඉදිකරන වේල්ලක් හේතුවෙන් වියළි කාලගුණයේදී ඉන්දීය පාර්ශවයට ලැබෙන ජල ප්‍රමාණය 85% කින් පමණ අඩුවනු ඇතැයි ඉන්දියාව බිය පළ කරයි.

බ්‍රහ්මපුත්‍ර ද්‍රෝණියෙන් මෙගාවොට් 76,000 කට අධික ජල විදුලි ධාරිතාවක් 2047 වන විට ලබා ගැනීම සඳහා ඩොලර් බිලියන 77 ක සම්ප්‍රේෂණ සැලසුමක් ඉන්දියාව පසුගිය වසරේ නිවේදනය කළේය.

2030 වන විට පොසිල නොවන බලශක්ති උත්පාදන ධාරිතාව මෙගාවොට් 500,000 ක් ලබා ගැනීමටත්, 2070 වන විට ශුද්ධ ශුන්‍ය (net zero) විමෝචන මට්ටමට ළඟා වීමටත් ඉන්දියාව ඉලක්ක කරයි.