ගල් අඟුරු ආනයනය කිරීමේදී පැන නැගී ඇති තත්ත්වයට සමාන සිදුවීම් පසුගිය වසරවල ද සිදුවී ඇති බවත්, එවැනි අවස්ථාවන්හිදී අදාළ සැපයුම් සමාගම්වලින් දඩ මුදල් අයකරගෙන ඇති බවත් කැබිනට් ප්‍රකාශක අමාත්‍ය නලින්ද ජයතිස්ස පැවසීය.

සතිපතා කැබිනට් මාධ්‍ය හමුවේදී මතභේදාත්මක ගල් අඟුරු තොග හේතුවෙන් රජයට පාඩු සිදුවී ඇත්දැයි මාධ්‍යවේදියකු ඇසූ ප්‍රශ්නයකට පිළිතුරු දෙමින් ඔහු මෙම අදහස් පළ කළේය.

තවදුරටත් පැහැදිලි කරමින් අමාත්‍ය ජයතිස්ස පැවසුවේ, “මෙට්‍රික් ටොන් 60,000ක් වූ පළමු තොගය මෙම ගැටලුවට මුහුණ දුන්නා. සාම්පල පරීක්ෂණවලින් කිලෝ කැලරි 5,520ක කැලරි වටිනාකමක් පෙන්නුම් කළේ. ඒ අනුව, නියමිත දඩ මුදල මෙන් දෙගුණයක දඩයක් සැපයුම්කරුට නියම කෙරෙනවා” යනුවෙනි.

“දෙවැනි තොගයේ කිලෝ කැලරි 6,017ක කැලරි වටිනාකමක් වාර්තා වුණා. පිළිගත හැකි පරාසය 5,900 සිට 6,150 දක්වා පවතින්නේ.” ඔහු තවදුරටත් පැවසුවේය.

ඉතිරි තොග ගැන සඳහන් කරමින් අමාත්‍යවරයා, “තුන්වැනි සහ සිව්වැනි තොග මේ වන විට ගොඩබෑම සිදුවෙමින් පවතිනවා, නියැදි පරීක්ෂාව අවසන් වූ පසු තීරණයක් ගන්නවා.” යනුවෙන් පැවසීය.

අතීත අවස්ථා ඉස්මතු කරමින් අමාත්‍ය ජයතිස්ස පැවසුවේ, “අතීතයේ දීත් එවැනි සිදුවීම් කිහිපයක් වාර්තා වී තිබෙනවා. 2020–2021 කාලය තුළ ඇමරිකානු ඩොලර් මිලියන 7.54ක දඩ මුදල් අයකර ගෙන තිබෙනවා. 2021 සහ 2022 අතර කාලය තුළ ඇමරිකානු ඩොලර් මිලියන 6.1ක දඩ මුදල් නියම කෙරුණා, 2022–2023 දී ඇමරිකානු ඩොලර් මිලියන 7.8ක දඩ මුදල් අය කරගෙන තිබෙනවා,” යනුවෙනි.

“ගල් අඟුරු ආනයනය අවශ්‍ය ප්‍රමිතීන් සපුරාලීමට අපොහොසත් වුණොත් දඬුවම් නියම කෙරෙනවා, ගල් අඟුරු භාවිතයට නුසුදුසු යැයි සැලකෙනවා නම්, එය ඉවත් කරනවා. මෙය අසාමාන්‍ය සිදුවීමක් නෙවෙයි.” යනුවෙන් ස්ථාපිත ක්‍රියාපටිපාටි අවධාරණය කරමින් ඔහු පැවසුවේය.

“පැටවුම් වරායේ පරීක්ෂණ වාර්තා මගින් ප්‍රමිතීන්ට අනුකූල බව තහවුරු වෙලා, නමුත් ශ්‍රී ලංකාවේ ගොඩබෑමෙන් පසු ගැටළු හඳුනාගත්තොත්, ඒ අනුව දඬුවම් පනවනවා. 2020, 2021, 2022 සහ 2023 දී ප්‍රමිතියෙන් තොර ඇතැම් තොග සඳහා එවැනි දඬුවම් ක්‍රියාත්මක කෙරුණා” යනුවෙන් ඔහු තවදුරටත් පැහැදිලි කළේය.

“මෙයින් අදහස් කරන්නේ සියලුම තොග ගැටළු සහගත බව නෙවෙයි. සමහර තොගවල පමණක් ගැටළු තියෙන්න පුළුවන්, එවැනි තත්ත්වයන් විසඳීම සඳහා ගල් අඟුරු සැපයුම් සමාගම් විසින් එකඟ වූ ස්ථාපිත ක්‍රියාපටිපාටියක් තිබෙනවා” යනුවෙන් අමාත්‍ය ජයතිස්ස වැඩිදුරටත් පැවසුවේය.