හිටපු ජනාධිපති මහින්ද රාජපක්ෂගේ බිරිඳ වන ශිරන්ති රාජපක්ෂ මූල්‍ය අපරාධ විමර්ශන කොට්ඨාශය (FCID) හමුවේ පෙනීසිටින ලෙස දැනුම් දී තිබේ.

ප්‍රකාශයක් සටහන් කර ගැනීම සඳහා අද (27) පෙ.ව. 9.00 ට FCID හමුවේ පෙනීසිටින ලෙස ජනවාරි 23 වන දින ඇයට දැනුම් දී ඇති බව වාර්තා වේ.

හිටපු ජනාධිපති මහින්ද රාජපක්ෂගේ පාලන සමයේදී ‘සිරිලිය’ නමින් පවත්වාගෙන ගිය බැංකු ගිණුමකට අදාළව සිදු වූ බව කියන මූල්‍ය අක්‍රමිකතා සම්බන්ධයෙන් සිදු කෙරෙන විමර්ශන සම්බන්ධයෙන් මෙම සිතාසිය නිකුත් කළ බව FCID ප්‍රකාශ කළේය.

මෙම සිද්ධිය සම්බන්ධයෙන් ‘යහපාලනය’ ආණ්ඩුව සමයේදී පළමු වරට විමර්ශන ආරම්භ කරන ලදී.

මේ අතර, ශ්‍රී ලංකා පොදුජන පෙරමුණේ ජාතික සංවිධායක සහ පාර්ලිමේන්තු මන්ත්‍රී නාමල් රාජපක්ෂට ද නොතීසි නිකුත් කර ඇති අතර, ඊයේ (26) දින අපරාධ පරීක්ෂණ දෙපාර්තමේන්තුව (CID) හමුවේ පෙනී සිටින ලෙස නියෝග කර තිබිණි.

නාමල් රාජපක්ෂ ඉන්දියාවේ සංචාරයක යෙදී සිටියදී ඊයේ උදෑසන මෙම නොතීසිය නිකුත් කළ බව ශ්‍රී ලංකා පොදුජන පෙරමුණේ මහලේකම් සාගර කාරියවසම් පැවසීය.