January 24, 2026
කොළඹ වරාය නගරය කලාපීය මූල්ය හා වෙළඳ මධ්යස්ථානයක් ලෙස ස්ථානගත කිරීම සඳහා එක්සත් අරාබි එමීර් රාජ්යයේ ආයෝජකයන් ආකර්ෂණය කර ගැනීමට උත්සාහ කරන බැවින් ශ්රී ලංකාව වසර 15ක් දක්වා බදු සහන කාල ලබාදීමට සැලසුම්කර ඇති බව ගල්ෆ් නිවුස් පුවත්පත වාර්තා කර තිබේ.
කර්මාන්ත හා ව්යවසායකත්ව සංවර්ධන නියෝජ්ය අමාත්ය චතුරංග අබේසිංහ ගල්ෆ් නිවුස් වෙත අදහස් දක්වමින් පවසා ඇත්තේ, ශ්රී ලංකාව විදේශ ප්රාග්ධනය සඳහා වඩාත් පුරෝකථනය කළ හැකි සහ තරඟකාරී ගමනාන්තයක් බවට පත් කිරීම සඳහා රජය ආයෝජන අනුමැතිය සහ දිරිගැන්වීම් විධිමත් කරන බවයි.
“අපට පුළුල් ආයෝජන අවස්ථා දෙකක් තිබෙනවා – කලාපීය මූල්ය මධ්යස්ථානයක් ලෙස සංවර්ධනය වෙමින් පවතින කොළඹ වරාය නගරය සහ ආයෝජන මණ්ඩලය යටතේ ව්යාපෘති. සමහර ආයෝජන වසර 15ක් දක්වා බදු සහන කාල සඳහා සුදුසුකම් ලබනවා, අනෙකුත් දිරිගැන්වීම් ද ඇතුළත්. නව ආයෝජන ප්රවර්ධන පනත සමඟ, මේ සියල්ල විධිමත් කර පැහැදිලි කරන්න නියමිතයි,” යනුවෙන් අබේසිංහ ඩුබායි හි පැවති ඉන්වෙස්ට් ශ්රී ලංකා ආයෝජක සංසදයට සමගාමීව ගල්ෆ් නිවුස් වෙත පැවසීය.
ශ්රී ලංකාවේ මධ්යස්ථ විදේශ ප්රතිපත්තිය සහ පුළුල් වන වෙළඳ ප්රවේශය කලාපීය පදනමක් සොයන මැද පෙරදිග ව්යාපාර සඳහා ආකර්ෂණීය කරවන බව අබේසිංහ පැවසූ අතර චීනය, ඇමරිකා එක්සත් ජනපදය, ඉන්දියාව සහ මැදපෙරදිග සමඟ ශ්රී ලංකාව සම්බන්ධ වී සිටින බව ද සඳහන් කළේය.
සුඛෝපභෝගී සංචාරක ව්යාපාරය, වරාය සහ හරිත බලශක්ති ව්යාපෘතිවල අවස්ථා පෙන්වා දෙමින්, විදේශ ආයෝජකයන් සඳහා ප්රමුඛතා අංශ ලෙස කෘෂිකර්මාන්තය, සංචාරක ව්යාපාරය, සමුද්රීය සැපයුම් සහ පුනර්ජනනීය බලශක්තිය ඔහු ඉස්මතු කළේය.
“ගමන පථය පැහැදිලියි. ස්ථාවරත්වය ක්රියාත්මකයි. ප්රතිසංස්කරණ සිදුවෙමින් පවතිනවා. අපි වියට්නාමය, දකුණු කොරියාව සහ ඉන්දියාවේ හැරීම ගැන කතා කරනවා. ඩුබායි පැමිණි ආකාරය ගැන අපි කතා කරනවා, ඊළඟට එම වෙනස ශ්රී ලංකාවේ සිදුවෙයි,” අබේසිංහ පැවසීය.
ප්රතිපත්තිමය නොගැළපීම සහ දූෂණය හේතුවෙන් පසුගිය දශක තුන තුළ ශ්රී ලංකාවට වර්ධන අවස්ථා අහිමි වූ නමුත් 2022 සිට තත්ත්වය වෙනස් වී ඇති බවත්, ප්රතිසංස්කරණ මගින් ආයෝජන සඳහා නීතිමය රාමුව ශක්තිමත් කරන බවත් ඔහු පැවසීය.
“අපේ ආර්ථිකය දැන් ස්ථාවර සහ පුරෝකථනය කළ හැකි මට්ටමක පවතිනවා. ප්රධාන ප්රතිසංස්කරණ ක්රියාත්මක වෙමින් පවතිනවා, ප්රතිපත්ති ස්ථාවරයි, සහ ආයෝජන සඳහා නීතිමය රාමුව ශක්තිමත් වෙමින් පවතිනවා,” යනුවෙන් ඔහු පැවසුවේය.
ඩිජිටල්කරණ මුලපිරීම් සහ ඉඩම් ප්රතිපත්ති ප්රතිසංස්කරණ ආදී දිගුකාලීන ආයෝජන බාධක ඉවත් කරන බව ද ඔහු සඳහන් කළේය.
“මෙය තවදුරටත් සූදුවක් නෙවෙයි. දිගුකාලීන කොටස්කරුවන් ලෙස ආයෝජකයන්ට ශ්රී ලංකාවේ වර්ධන ගමනේ කොටසක් විය හැකියි,” අබේසිංහ තවදුරටත් පැවසීය.
