දිත්වා සුළි කුණාටුව සමග ඇති වූ ගංවතුර හේතුවෙන් කිකිළියන් මිලියන 3ක් මිය යෑම නිසා රට පුරා බිත්තර හිඟයක් ඇතිවීමේ අවදානමක් මතුව තිබේ.

සීදූව, රද්දොළුගම පිහිටි සමස්ත ලංකා බේකරි හිමියන්ගේ සංගමයේ ප්‍රධාන කාර්යාල ශ්‍රවණාගාරයේ පැවති මාධ්‍ය හමුවකදී එහි සභාපති එන්.කේ.ජයවර්ධන සඳහන් කළේ බිත්තර මිල දැනටමත් ඉහළ ගොස් ඇති බවයි.

මෙම තත්ත්වයට පිළියම් යෙදීමට වහාම පියවර ගන්නා ලෙස ඔහු රජයෙන් ඉල්ලා සිටියේය.

“පිටි, සීනි, බිත්තර සහ මාගරින් කියන්නේ බේකරි කර්මාන්තයට අත්‍යවශ්‍ය අමුද්‍රව්‍ය හතර. බිත්තර හිඟයක් ඇති වුණොත් බේකරි නිෂ්පාදනවල මිල ඉහළ යන්න පුළුවන් නැත්නම් සමස්ත කර්මාන්තයම නතර වෙන්නත් පුළුවන්,” ඔහු පැවසීය.

වාර්ෂික කේක් අලෙවියෙන් 25%ක් එළඹෙන නත්තල් සහ 2026 අලුත් අවුරුදු සමයේදී සිදුවන බවත්, බිත්තර හිඟයක් ඇති වුවහොත් උත්සව සමයේ සැපයුම්වලට සැළකිව යුතු ලෙස බලපෑ හැකි බවටත් ඔහු අනතුරු ඇඟවීය.

ජයවර්ධන රජයෙන් ඉල්ලා සිටියේ වත්මන් තත්ත්වය පිළිබඳ ගැඹුරු අධ්‍යයනයක් සිදු කරන ලෙස සහ ඇතිවිය හැකි බිත්තර හිඟයකින් රට පුරා පාරිභෝගිකයන්ට සහ බේකරි කර්මාන්තයට විය හැකි බලපෑම වැළැක්වීම සඳහා විකල්ප විසඳුම් සෙවීමට පියවර ගන්නා ලෙසයි.