දිට්වා සුළි කුණාටුවෙන් පීඩාවට පත් ජනතාවට උපකාර කිරීම සඳහා රජයට දැනටමත් සැළකිව යුතු මූල්‍ය අවකාශයක් ඇති බවත්, සහන සහ පිරිසිදු කිරීමේ මෙහෙයුම් ප්‍රමාද වීමට කිසිදු නිදහසට කරුණක් නොමැති බවත් සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා පාර්ලිමේන්තුවේදී කියා සිටියේය.

පුනරාවර්තන වියදම් සඳහා වෙන්කර ඇති රුපියල් බිලියන 30ක් සහ නැවත වෙන් කළ හැකි තවත් රුපියල් බිලියන 20ක් රජයට දැනට ඇති බවත්, ඒ අනුව ආපදා ප්‍රතිචාර සඳහා වහාම යෙදවිය හැකි රුපියල් බිලියන 50ක් ඇති බවත් ඔහු පැවසීය.

දිට්වා කුණාටුවෙන් ශ්‍රී ලංකාවට සිදුව ඇති මුළු ආර්ථික පාඩුව අමෙරිකානු ඩොලර් බිලියන 3ක් හෝ ඊට වැඩි විය හැකි බව මුල් තක්සේරු කිරීම්වලින් පෙනී යන බව ද මන්ත්‍රීවරයා සඳහන් කළේය.

ආපදා තක්සේරුව පිළිබඳ ලෝක බැංකුවෙන් සවිස්තරාත්මක ඇගයීමක් අපේක්ෂා කෙරේ.

2026 අයවැය සීමාව අසාමාන්‍ය තත්වයන් යටතේ ගැළපීමට රාජ්‍ය මූල්‍ය කළමනාකරණ පනත යටතේ ඉඩ සලසන බවත්, හදිසි ප්‍රතිසංස්කරණ අවශ්‍යතා සපුරාලීම සඳහා ප්‍රාග්ධන වියදම් සීමාව දළ දේශීය නිෂ්පාදිතයෙන් සියයට 13 සිට සියයට 14–14.5 දක්වා ඉහළ නැංවීම පාර්ලිමේන්තුවට සළකා බැලිය හැකි බවත් ඔහු පැවසීය.

මන්ත්‍රීවරයා පැවසුවේ භාණ්ඩාගාරය සතුව වහාම භාවිත කළ හැකි රුපියල් ට්‍රිලියන 1.2කට අධික මුදල් ප්‍රමාණයක් ඇති අතර, ප්‍රතිසාධන වියදම් සඳහා ප්‍රමුඛතාව දීම වෙනුවෙන් ලබන වසරේ කල්පිරීමට නියමිත රුපියල් බිලියන 500ක භාණ්ඩාගාර බිල්පත් වසරකින් කල් දැමිය හැකි බවයි.

මේ අතර, නිවාස, කර්මාන්ත සහ හානියට පත් ප්‍රවාහන ජාල නැවත ගොඩනැගීම සඳහා අමෙරිකානු ඩොලර් බිලියන 7කට ආසන්න මුදලක් අවශ්‍ය විය හැකි බව ශ්‍රී ලංකා බලධාරීන් ඊයේ ප්‍රකාශ කර තිබිණි.

අත්‍යවශ්‍ය සේවා කොමසාරිස් ජනරාල් ප්‍රභාත් චන්ද්‍රකීර්ති පැවසුවේ මෙම අගය මූලික ඇස්තමේන්තුවක් වන අතර සම්පූර්ණ ප්‍රතිසංස්කරණ තක්සේරු කිරීම් අවසන් වූ පසු එය වෙනස් විය හැකි බවයි.