ඊසානදිග මෝසම් සක්‍රීයව පවතින බැවින් මෙම මාසයේ ශ්‍රී ලංකාවට වැසි ඇදහැළෙන බව කාලගුණ විද්‍යා දෙපාර්තමේන්තුව පවසයි.

කාලගුණ විද්‍යා දෙපාර්තමේන්තුවේ අධ්‍යක්ෂ මෙරිල් මෙන්ඩිස් ‘ඩේලි මිරර්’ වෙත පවසා ඇත්තේ, දෙසැම්බර් දෙවැනි සතියේ සිට ශ්‍රී ලංකාවට වැසි ඇදහැළෙන බවත්, එම කාලය තුළ මෝසම වැසි වඩාත් ක්‍රියාකාරී වනු ඇති බවයි.

“ශ්‍රී ලංකාව දැනට මෝසම් කාලය තුළ පවතින අතර, එම නිසා දෙසැම්බර් දෙවන සතිය තුළ ඊසානදිග මෝසම් වැසි වඩාත් ක්‍රියාකාරී වනු ඇතැයි අපේක්ෂා කරනවා” ඔහු පවසයි.

උතුර සහ නැගෙනහිර පළාත් බොහෝදුරට වසර අවසානයේ වැටෙන ඊසානදිග මෝසම් වැසිවලින් පීඩාවට පත්වේ.

කෙසේවෙතත්, තවත් අඩු පීඩන පද්ධතියක් හෝ සුළි කුණාටුවක් වර්ධනය වීම පිළිබඳ වාර්තා ඔහු ප්‍රතික්ෂේප කරයි.

“මේ වන විට ශ්‍රී ලංකාව අසල කොතැනකවත් අඩු පීඩන පද්ධතියක් හෝ සුළි කුණාටුවක් ඇති බවට කිසිදු සලකුණක් නැහැ” ඔහු සඳහන් කරයි.

මේ අතර, ඉදිරි දිනවලදී උතුර, බටහිර සහ දකුණු පළාත්වල සහ මහනුවර සහ නුවරඑළිය දිස්ත්‍රික්කයේ වැසි ඇති වන බවට කාලගුණ විද්‍යා දෙපාර්තමේන්තුව විසින් එහි නිල කාලගුණ අනාවැකියේ පුරෝකථනය කර තිබිණි.

ඌව, උතුරු මැද සහ නැගෙනහිර පළාත්වල ගිගුරුම් සහිත වැසි පුරෝකථනය කර ඇත.

වැඩිම වර්ෂාපතනය වන මිලිමීටර් 42 පුනරීන් ප්‍රදේශයෙන් වාර්තා වූ අතර, ඉරණමඩු ප්‍රදේශයට මිලිමීටර් 41 ක්, වවුනිකුලම් ප්‍රදේශයට මිලිමීටර් 21.5 ක් සහ කිලිනොච්චි ප්‍රදේශයට මිලිමීටර් 20.5 ක වර්ෂාපතනයක් ලැබී තිබේ.

කොළඹ සහ ජල පෝෂක ප්‍රදේශ ඇතුළු අනෙකුත් ප්‍රදේශවලට ඊයේ සවස් වන විට සැලකිය යුතු වර්ෂාපතනයක් ලැබී නොතිබිණි.