ශ්‍රී ලංකාවේ පළමු සුපිරි මෝටර් රථය නිර්මාණය කළ පුරෝගාමී විදුලි වාහන නිෂ්පාදකයා වන වේගා, දියුණු කෘත්‍රිම බුද්ධිය සහ රොබෝ තාක්ෂණය උපයෝගී කරගනිමින් මෙරට පළමු ස්වයංක්‍රීය වාහනය සංවර්ධනය කරමින් සිටී.

ඩිජිටල් ආර්ථික අමාත්‍යාංශය සහ SLT-Mobitel විසින් කොළඹ දී සංවිධාන කරන ලද ජාතික AI ප්‍රදර්ශනය සහ සම්මන්ත්‍රණයේ පැවති මණ්ඩල සාකච්ඡාවකදී වේගා හි මව් සමාගම වන CodeGen හි නිර්මාතෘ සහ ප්‍රධාන විධායක නිලධාරී ආචාර්ය හර්ෂ සුබසිංහ විසින් මෙම නිවේදනය කරන ලදී.

AI සහ සංකීර්ණ ඉංජිනේරු විද්‍යාව පිළිබඳ එම සමාගමේ ගැඹුරු විශේෂඥතාව මත ගොඩනැගෙන මෙම ව්‍යාපෘතිය දැනටමත් ක්‍රියාත්මක වෙමින් පවතින බව ආචාර්ය සුබසිංහ හෙළි කළේය.

“AI භාවිත කරන වේගා හි අපට සම්පූර්ණයෙන්ම වෙනස් ව්‍යාපාරයක් තියෙන්නේ. ස්වයංක්‍රීය වාහනයක් සංවර්ධනය කරන පළමු ශ්‍රී ලංකා සමාගම අප විය හැකි යැයි අපි බලාපොරොත්තු වෙනවා,” ශ්‍රී ලංකාවේ ඉහළම තාක්‍ෂණ නායකයන් කිහිප දෙනෙකු සහභාගී වූ සාකච්ඡාවකදී ආචාර්ය සුබසිංහ පැවසීය.

මෙම පියවර ඉහළ කාර්යසාධනයක් සහිත මෝටර් රථ ඉංජිනේරු විද්‍යාව සඳහා ශ්‍රී ලංකාව ගෝලීය සිතියමේ තැබූ වේගා හි ප්‍රශංසනීය විදුලි සුපිරි මෝටර් රථයේ සිට සැළකිව යුතු ඉදිරි පිම්මකි.

ස්වයංක්‍රීය රිය පැදවීම කෙරෙහි අවධානය යොමු කිරීම මඟින් සමාගම සහ රට ඊළඟ පරම්පරාවේ ප්‍රවාහන තාක්ෂණයේ ඉදිරියෙන්ම ස්ථානගත කිරීම අරමුණු කරයි.

ආචාර්ය සුබසිංහ මුලපිරීම බලගන්වන තාක්ෂණය පිළිබඳ ප්‍රධාන තොරතුරු බෙදා ගනිමින් වේගා ගෝලීය ස්වයංක්‍රීය වාහන කර්මාන්තයේ ප්‍රමිතියක් වන සංවේදක විලයන උපාය මාර්ගයක් භාවිත කරන බව තහවුරු කළේය.

මෙම ව්‍යාපෘතිය රොබෝ විද්‍යාව සහ ස්වයංක්‍රීය පද්ධතිවල CodeGen හි පුළුල් වැඩසටහන්වල දිගුවකි.

ප්‍රධාන අභියෝගය වන්නේ සංකීර්ණ AI ආකෘති වාහන තුළ සකසනයන් මත කාර්යක්ෂමව ක්‍රියාත්මක කිරීම සඳහා ප්‍රශස්ත කිරීම බව ආචාර්ය සුබසිංහ සඳහන් කළේය.

එය මහා පරිමාණ AI ප්‍රායෝගික, සැබෑ ලෝක මෝටර් රථ යෙදුමක් බවට පරිවර්තනය කිරීමේ තීරණාත්මක පියවරකි.

කෙසේවෙතත්, වාහනය දියත් කිරීම සඳහා කාලරාමුවක් ආචාර්ය සුබසිංහ නියම කළේ නැත