විදේශ රැකියා සම්බන්ධ පැමිණිලි විමර්ශනය කර කඩිනමින් විසඳීම සඳහා පොලිස් නිලධාරීන්ගෙන් සමන්විත විශේෂ විමර්ශන ඒකකයක් ශ්‍රී ලංකා විදේශ රැකියා කාර්යාංශයේ ප්‍රධාන කාර්යාලයේදී ඊයේ (18) ආරම්භ කරන ලදී.

ප්‍රධාන පොලිස් පරීක්ෂකවරයකුගේ නායකත්වයෙන් යුත් පොලිස් නිලධාරීන් 16 දෙනෙකු මෙම ඒකකයට ඇතුළත් වේ.

විදේශ රැකියා අංශයේ වංචා මැඩපැවැත්වීම සහ පැමිණිලි සඳහා කඩිනම් විසඳුම් සහතික කිරීමෙන් ශ්‍රී ලාංකිකයන්ට සහන සැලසීමේ අරමුණින් මෙම ඒකකය ස්ථාපිත කරන ලද බව විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර පැවසීය.

වංචාකරුවන් නිරන්තරයෙන් නව උපක්‍රම අනුගමනය කිරීම හේතුවෙන් මෑත මාසවලදී පැමිණිලි සංඛ්‍යාව ඉහළ ගොස් ඇති බව ඔහු පැවසීය.

“සමහරක් ලියාපදිංචි නොකළ ආයතන ලෙස ක්‍රියාත්මක වනවා. කුඩා කණ්ඩායමක් ලියාපදිංචි ආයතන ලෙස පෙනී ඉන්නේ. තවත් සමහරු උපදේශන ආයතන ලෙස වෙස්වලා ගනිමින් හෝ ජනතාව රැවටීම සඳහා සංචාරක වීසා ක්‍රියාවලීන් හසුරුවනවා. මේවා අපට දැන් ලැබෙන පැමිණිලි,” ඔහු පැහැදිලි කළේය.

දේශපාලන මැදිහත්වීම් හේතුවෙන් කාර්යාංශයේ කීර්ති නාමය අතීතයේ දී කැළැල් වී ඇති බව ද නියෝජ්‍ය අමාත්‍යවරයා පිළිගත් නමුත් වත්මන් පරිපාලනය මහජන විශ්වාසය යථා තත්ත්වයට පත් කරමින් සිටින බවට සහතික විය.

1985 දී පිහිටුවන ලද මෙම කාර්යාංශය රටේ විදේශ රැකියා නියාමන අධිකාරිය ලෙස ක්‍රියාත්මක වේ.

“බොහෝ අය රැකියා සඳහා විදේශගත වීමේ අපේක්ෂාවෙන් අප වෙත ආවත් බහුතරයක් එන්නේ පැමිණිලි හෝ දුක්ගැනවිලි සමඟ. අපගේ වගකීම වන්නේ ඵලදායී හා කඩිනම් විසඳුම් ලබා දීමයි,” ඔහු පැවසීය.

විදේශ රැකියා කාර්යාංශ පනත සංශෝධනය කිරීම හෝ අවශ්‍ය නම් නව පනතක් හඳුන්වා දීම පිළිබඳව රජය සළකා බලමින් සිටින බව හේමචන්ද්‍ර තවදුරටත් පැවසීය.