බගවන්තලාව ප්‍රදේශයෙන් සත්ව හිංසනය පිළිබඳ කම්පන සහගත සිදුවීමක් වාර්තා වී තිබේ.

ඊයේ (15) දින වෙළඳසැලක් ඉදිරිපිට නිදාසිටි සුනඛයකුට උණු වතුර දමා එළවා දමන ආකාරය ආරක්ෂක කැමරා දර්ශනවල සටහන් වී ඇත.

ප්‍රදේශයේ ව්‍යාපාරිකයෙකුට අයත් මෙම බල්ලා සෑම දිනකම තම හිමිකරු සමඟ නගරයට ගොස් සවස් වරුවේ ඔහු සමඟ නිවසට පැමිණෙන බව වාර්තා වේ.

ඇසින් දුටු සාක්ෂිකරුවන්ට අනුව, අසල පිහිටි පරණ යකඩ සාප්පුවක හිමිකරු උණු වතුර වත්කරන මොහොත වනවිට සත්වයා කිසිවකුට කරදරයක් නොකර සාප්පුවක් ඉදිරිපිට නිහඬව වැතිර සිටියේය.

පිළිස්සීමෙන් සුනඛයා වේදනාවෙන් කෑ ගසා එම ස්ථානයෙන් පළාගිය බව ප්‍රදේශවාසීහු පවසති.

සුනඛයාගේ හිමිකරු සිද්ධිය සම්බන්ධයෙන් පැමිණිල්ලක් ගොනු කළ බව බගවන්තලාව පොලිසිය සඳහන් කරයි.

තුවාල ලැබූ සත්වයා වෛද්‍ය වාර්තාවක් සඳහා පශු වෛද්‍යවරයෙකු වෙත ඉදිරිපත් කරන බවත්, පසුව සැකකරු අත්අඩංගුවට ගෙන හැටන් මහේස්ත්‍රාත් අධිකරණයට ඉදිරිපත් කිරීමට පියවර ගන්නා බවත් පොලිසිය වැඩිදුරටත් පවසයි.