ශ්‍රී ලංකාවේ පෞද්ගලික බැංකුවක වෙබ් අඩවියට සමාන ව්‍යාජ වෙබ් අඩවියක් නිර්මාණය කර එම බැංකුවට අයත් රුපියල් මිලියන 50 ක මුදලක් වංචනික ලෙස ලබාගැනීමේ චෝදනා මත සැකකරුවන් සිව්දෙනෙකු සැප්තැම්බර් 25 වන දින දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම නියෝග කළේය.

මෙම වංචනික ක්‍රමයට සම්බන්ධ තවත් සැකකරුවන් අත්අඩංගුවට ගෙන අධිකරණයට ඉදිරිපත් කළ යුතු බවට මහේස්ත්‍රාත්වරයා තවදුරටත් නියෝග කළේය.

අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකය මීට පෙර මෙම වංචනික මෙහෙයුම සහ විමර්ශන පිළිබඳව අධිකරණයට දැනුම් දී තිබිණි.

පසුව, සැකකරුවන් සිව්දෙනා ඊයේ අත්අඩංගුවට ගෙන අධිකරණයට ඉදිරිපත් කරන ලදී.

මෙම මහාපරිමාණ වංචාව රට තුළ සංවිධානාත්මකව සිදුකර ඇති බවත්, තවත් සැකකරුවන් අත්අඩංගුවට ගෙන අධිකරණයට ඉදිරිපත් කිරීමට අපේක්ෂා කරන බවත් විමර්ශන නිලධාරීහු අධිකරණයට පැවසූහ.

සැකකරුවන් මත්ද්‍රව්‍යවලට දැඩි ලෙස ඇබ්බැහි වී ඇති බවත් ඔවුහු අධිකරණයට දැනුම්දුන්හ.