ත්‍රස්තවාදය වැළැක්වීමේ පනත (PTA) ශ්‍රී ලංකාවේ අඛණ්ඩව භාවිත කිරීම පිළිබඳ කණස්සල්ලට පත්ව සිටින යුරෝපා සංගමය (EU) එම නීති අහෝසි කිරීම සඳහා ගෙන ඇති පියවර පිළිගෙන තිබේ.

ජිනීවාහි පැවති මානව හිමිකම් කවුන්සිලයේ 60 වැනි සැසිවාරයේදී අදහස් දක්වමින්, යුරෝපා සංගම් නියෝජිත පිරිස ශ්‍රී ලංකාවේ සංක්‍රාන්ති යුක්තිය සඳහා වැඩිවන අවශ්‍යතාව සිහිපත් කළහ.

“ස්වාධීන මහජන නඩු පැවරීමේ කාර්යාලයක් පිහිටුවීමේ මුලපිරීම ඇතුළුව රජයේ උත්සාහයන් අපි පිළිගනිමු. කෙසේවෙතත්, විශේෂයෙන් මියගිය සහ තවමත් අතුරුදහන් වූ පුද්ගලයන්ගේ බොහෝ නඩු සම්බන්ධයෙන්, වින්දිතයන් සඳහා වගවීම සහ යුක්තිය පිළිබඳ සැළකිව යුතු ප්‍රගතියක් නොමැතිකම පිළිබඳ අපි තවමත් කණස්සල්ලට පත්ව සිටිමු. මෙම තත්ත්වය කඩිනමින් සහ තීරණාත්මක කැපවීමකින් යුතුව විසඳා ගත යුතුය. නීතියේ ආධිපත්‍යයට සහ නැවත සිදු නොවීම සහතික කිරීම සඳහා වගවීම කේන්ද්‍රීය වේ,” යනුවෙන් යුරෝපා සංගමය පැවසීය.

යුරෝපා සංගමය ශ්‍රී ලංකාවේ මානව හිමිකම් තත්ත්වය නිරීක්ෂණය කරන බවත්, ත්‍රස්තවාදය වැළැක්වීමේ පනත අඛණ්ඩව භාවිත කිරීම පිළිබඳව තවමත් සැළකිලිමත් වන බවත්, මෙම නීති අහෝසි කිරීම සඳහා ගෙන ඇති පියවරත් පිළිගනී.

“නීතිමය හා ආයතනික ප්‍රතිසංස්කරණවල වැදගත්කම මෙන්ම අන්තර්ජාතික මානව හිමිකම් බැඳීම්වලට අනුකූලව නව නීති ගෙන ඒමේ අවශ්‍යතාව අපි සිහිපත් කරමු,” යනුවෙන් යුරෝපා සංගමය පැවසීය.

ප්‍රතිසංස්කරණ ක්‍රියාත්මක කිරීමේදී සහ මානව හිමිකම් ආරක්ෂා කිරීම ශක්තිමත් කිරීමේදී ශ්‍රී ලංකාවට සහාය දීමට සූදානම් බව යුරෝපා සංගමය පැවසීය.