September 6, 2025
එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලයේ(OHCHR) නවතම වාර්තාවේ දක්වා ඇති අන්තර්ජාතික මැදිහත්වීම් සඳහා වන ඉල්ලීම් ප්‍රතික්ෂේප කරමින්, දේශීය ක්‍රියාවලීන් හරහා පරිවර්තනීය ප්‍රතිසංස්කරණ ඉදිරියට ගෙන යෑමට ශ්‍රී ලංකා රජය සිය කැපවීම නැවත අවධාරණය කර තිබේ.
සියලුම පුරවැසියන්ගේ අයිතිවාසිකම් සහ යහපැවැත්ම ශක්තිමත් කරන ප්‍රතිසංස්කරණ ක්‍රියාත්මක කිරීමට ශ්‍රී ලංකාවේ සිටින මහ කොමසාරිස්වරයා විසින් හඳුනාගෙන ඇති අවස්ථාව ශ්‍රී ලංකා රජය පිළිගෙන ඇත.
කෙසේවෙතත්, එවැනි ප්‍රගතියකට බාහිර මැදිහත්වීම්වලින් තොරව ප්‍රමාණවත් ඉඩක් සහ කාලයක් අවශ්‍ය බව රජය අවධාරණය කළේය.
“බාහිර මුලපිරීම් ජාතික උත්සාහයන්ට බාධාවක් ලෙස සහ ජනතාව බෙදීමට ලක්වීමේ අවදානමක් ලෙස පමණක් ක්‍රියා කරන බව ශ්‍රී ලංකාව නිරීක්ෂණය කරයි,” යනුවෙන් එම ප්‍රකාශයේ සඳහන් වී තිබිණි.
අන්තර්ජාතික ක්‍රියාමාර්ග සම්බන්ධයෙන් එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලයේ වාර්තාවේ නිගමන සහ නිර්දේශ සමඟ රජය එකඟ නොවන බව ද එහි සඳහන් වේ.
තම ස්ථාවරය නැවත තහවුරු කරමින්, ජාතිය, ආගම, පංතිය හෝ කුලය මත පදනම් වූ බෙදීම් හෝ වෙනස්කම් කිරීම් නොමැතිව තම ජනතාවගේ විවිධත්වයට ගරු කරන සහ සමරන ජාතියක් ගොඩනැගීම සඳහා ජනවරමක් සහ අවංක කැපවීමක් ඇති බව ශ්‍රී ලංකා රජය පැවසීය.
“ශ්‍රී ලංකාව තුළ ජාතිවාදය හෝ අන්තවාදය නැවත ඇතිවීමට ඉඩ නොතබන බවට රජය අධිෂ්ඨාන කරගෙන සිටී” යනුවෙන් එම නිවේදනයේ අවධාරණය කර ඇත.
