September 5, 2025
එක්සත් ජනපදයේ ආරක්ෂක දෙපාර්තමේන්තුව ‘යුද දෙපාර්තමේන්තුව’ ලෙස හැඳින්වීමට එක්සත් ජනපද ජනාධිපති ඩොනල්ඩ් ට්‍රම්ප් නියෝග කරයි.
ආරක්ෂක දෙපාර්තමේන්තුවට නව නාමය ද්විතීයික නාමයක් ලෙස භාවිත කිරීමට සහ ආරක්ෂක ලේකම් පීට් හෙග්සෙත් යුද ලේකම් ලෙස හැඳින්වීමට ඔහු අද දිනයේ විධායක නියෝගයක් අත්සන් කරනු ඇත.
එක්සත් ජනපද සන්නද්ධ සේවා අධීක්ෂණය කරන පෙන්ටගනය යුද දෙපාර්තමේන්තුවේ අනුප්‍රාප්තිකයා වන අතර එය ප්‍රථම වරට 1789 දී කැබිනට් මට්ටමේ ආයතනයක් ලෙස ස්ථාපිත කරන ලද අතර 1947 දක්වා පැවතිණි.
විධායක දෙපාර්තමේන්තු නිර්මාණය කිරීමේ වගකීම එක්සත් ජනපද කොංග්‍රසය සතු වන අතර එයින් අදහස් වන්නේ දෙපාර්තමේන්තුවේ නම නීත්‍යනුකූලව වෙනස් කිරීම සඳහා සංශෝධනයක් අවශ්‍ය වනු ඇති බවයි.
” ‘යුද දෙපාර්තමේන්තුව’ යන නම ආරක්ෂක හැකියාවන් පමණක් අවධාරණය කරන ‘ආරක්ෂක දෙපාර්තමේන්තුව’ හා සසඳන විට සූදානම සහ අධිෂ්ඨානය පිළිබඳ ශක්තිමත් පණිවිඩයක් ලබා දෙයි” යනුවෙන් සඳහන් විධායක නියෝගයේ සඳහන් බව බීබීසී ය වාර්තා කරයි.
ශක්තිය සහ අධිෂ්ඨානය ප්‍රක්ෂේපණය කිරීමේ උත්සාහයක් ලෙස, මෙම නියෝගය ආරක්ෂක ලේකම්වරයාට, ඔහුගේ දෙපාර්තමේන්තුවට සහ යටත් නිලධාරීන්ට නව මාතෘකා ද්විතීයික නාමයන් ලෙස භාවිත කිරීමට බලය පවරයි.
ට්‍රම්ප්ට කොංග්‍රස් අනුමැතියකින් තොරව නිල වශයෙන් නම වෙනස් කළ නොහැකි බැවින්, නැවත නම් කිරීමකට යෑම සඳහා ව්‍යවස්ථාදායක සහ විධායක ක්‍රියාමාර්ග නිර්දේශ කර ඇතුළත් කරන ලෙස ද නියෝගයෙන් හෙග්සෙත්ට උපදෙස් දෙයි.
යුද දෙපාර්තමේන්තුව ජෝර්ජ් වොෂින්ටන් විසින් පිහිටුවන ලද නමුත් දෙවැනි ලෝක යුද්ධයෙන් පසුව නැවත නම් කරන ලදී.
එහි නම ප්‍රතිස්ථාපනය කිරීම මගින් ජාතික අවශ්‍යතා කෙරෙහි මෙම දෙපාර්තමේන්තුවේ අවධානය තියුණු කරනු ඇති අතර එහි අවශ්‍යතා සුරක්ෂිත කර ගැනීම සඳහා යුද්ධයක් කිරීමට අමෙරිකාවේ සූදානම විරුද්ධවාදීන්ට සංඥා කරනු ඇති බව විධායක නියෝගයේ දැක්වේ.
නැවත සන්නාමකරණයක් සඳහා කොපමණ මුදලක් වැය වේදැයි ධවල මන්දිරය තවමත් පවසා නැතත් එක්සත් ජනපද මාධ්‍ය සිය ගණනක් ආයතන, ලාංඡන, විද්‍යුත් තැපැල් ලිපින, නිල ඇඳුම් සහ තවත් දේ ප්‍රතිසංස්කරණය කිරීම සඳහා ඩොලර් බිලියනයක මිලක් අපේක්ෂා කරයි.
එය වියදම් සහ නාස්තිය කපා හැරීමට පෙන්ටගනය ගන්නා උත්සාහයන්ට බාධාවක් විය හැකිය.
“අපට අවශ්‍ය නම් කොංග්‍රසයත් ඒ සඳහා එකඟ වේවි කියලා මට විශ්වාසයි. අපට එය අවශ්‍යයි කියලා මම හිතන්නේවත් නැහැ,” ජනාධිපතිවරයා පසුගිය සතියේ පැවසීය.
ට්‍රම්ප් සහ හෙග්සෙත් දෙපාර්තමේන්තුව යුද සටන් සහ රණශූර ආචාර ධර්ම කෙරෙහි නැවත අවධානය යොමු කිරීමට උත්සාහ කර ඇත.
ට්‍රම්ප් නොබෙල් සාම ත්‍යාගය ලබා ගැනීම පිළිබඳ යෝජනා බ්‍රහස්පතින්දා අවතක්සේරු කළේය.
“මට කළ හැක්කේ යුද්ධ නිවා දැමීම පමණයි. මම අවධානය සොයන්නේ නැහැ. මට අවශ්‍ය වන්නේ ජීවිත බේරා ගැනීමට පමණයි,” ඔහු බීබීසීයේ එක්සත් ජනපද හවුල්කරු වන සීබීඑස් ප්‍රවෘත්ති වෙත පැවසීය.
නැවත නම් කිරීමේ මෙම නියෝගය ජනාධිපතිවරයා බලයට පත්වීමෙන් පසු අත්සන් කළ 200 වැනි විධායක නියෝගය සනිටුහන් කරයි.
නැවත නම් කිරීම අපේක්ෂා කළ දෙයක් වුවද, එය සිදුවන්නේ චීනය එක්සත් ජනපදයට සහ එහි සහචරයන්ට පැහැදිලි පණිවිඩයක් ලෙස අර්ථකථනය කළ දැවැන්ත පෙළපාළියකදී නව ආයුධ, ඩ්‍රෝන යානා සහ අනෙකුත් හමුදා අංග පරාසයක් එළිදැක්වීමෙන් පසුවය.
