June 23, 2025
බලපත්‍ර අංක තහඩු මුද්‍රණය කිරීමේ බාධාව හේතුවෙන් මෙම වසරේ මැයි 1 වැනි දින සිට අංක තහඩු බලාපොරොත්තුවෙන් සිටින වාහන 15,000ක් පමණ පොරොත්තු ලේඛනයේ සිටින බව මෝටර් රථ ප්‍රවාහන දෙපාර්තමේන්තුව පවසයි.
වාහන අංක තහඩු මුද්‍රණය සඳහා නව සේවා සපයන්නකු තෝරා ගැනීම සඳහා දෙපාර්තමේන්තුව විසින් නව ප්‍රසම්පාදන ක්‍රියාවලියක් ආරම්භ කර ඇති බව මෝටර් රථ ප්‍රවාහන කොමසාරිස් ජෙනරාල් කමල් අමරසිංහ සඳහන් කරයි.
මැයි 1 වැනි දින සිට වාහන හිමියන් විශාල සංඛ්‍යාවක් හට බලපත්‍ර අංක තහඩු නොමැතිවීම හේතුවෙන් එම ප්‍රමාදයට ප්‍රතිචාර වශයෙන් මෙම පියවර ගෙන ඇත.
මුද්‍රණ වගකීම් භාර ගැනීම සඳහා සමාගම් 15 ක යෝජනා දැනට ඉදිරිපත් කර ඇති අතර, ගුණාත්මකභාවය, නියාමන ප්‍රමිතීන්ට අනුකූල වීම සහ තක්සේරු කිරීම සඳහා තාක්ෂණික ඇගයීම් කමිටුවක් දැනට අයැදුම්කරුවන්ගෙන් ලබාගත් සාම්පල සමාලෝචනය කරමින් සිටින බවත්, නව මුද්‍රණ සමාගමක් තෝරාගැනීමේ අවසන් කටයුතු අගෝස්තු මාසය වන විට අවසන් කිරීමට අපේක්ෂා කෙ‍රෙන බවත් ඔහු පවසයි.
අංක තහඩු නිකුත් කිරීමේ ප්‍රමාදය පිළිබඳව පොලිස්පතිවරයාට, සියලුම දිස්ත්‍රික් ලේකම්වරුන්ට සහ ප්‍රධාන ලේකම්වරුන්ට, මෝටර් රථ ප්‍රවාහන දෙපාර්තමේන්තුව නිල වශයෙන් දැනුම් දී ඇත.
