කාන්තා හා ළමා කටයුතු සහ වියළි කලාප සංවර්ධන හිටපු අමාත්‍ය චන්ද්‍රානි බණ්ඩාරට එරෙහිව අල්ලස් හෝ දූෂණ චෝදනා විමර්ශන කොමිසම අද (23) මහාධිකරණය හමුවේ නඩුවක් ගොනුකර තිබේ.

ඇය අමාත්‍ය ධුරය දැරූ කාලය තුළ වියළි කලාප සංවර්ධන අධ්‍යක්ෂ ලෙස එච්.එම්. චන්ද්‍රවංශ පත්කිරීමට බලපෑම් කිරීමෙන් නිසි ක්‍රියාපටිපාටි උල්ලංඝනය කිරීම සහ වියළි කලාප සංවර්ධන ව්‍යාපෘතිය තුළ විවිධ තනතුරු සඳහා සහචරයන් කිහිපදෙනකු නීතිවිරෝධී ලෙස බඳවාගැනීමට පහසුකම් සැලසීම යන චෝදනා ඇයට එරෙහිව එල්ල වී ඇත.

කොමිසම අනුව, මෙම ක්‍රියාමාර්ග 2019 ජනවාරි 14 සිට ජනවාරි 31 දක්වා කාලය තුළ සිදුකර ඇති අතර, එය අල්ලස් පනත යටතේ දඬුවම් ලැබිය හැකි වැරදි වේ.

අල්ලස් කොමිසම මෙම නඩුව වෙනම චෝදනා 11ක් යටතේ ගොනුකර ඇත.