ආරක්ෂක නිලධාරීන් ඉල්ලා සිටින සියලුම මන්ත්‍රීවරුන්ට එලෙස ආරක්ෂාව ලැබෙන බවට වන මාධ්‍ය වාර්තා ප්‍රතික්ෂේප කරමින් පාර්ලිමේන්තු මන්ත්‍රීවරුන් සහ පළාත් පාලන ආයතන සාමාජිකයන් සඳහා ආරක්ෂාව සැපයීම සම්බන්ධයෙන් පොලිස්පති ප්‍රියන්ත වීරසූරිය පැහැදිලි කිරීමක් නිකුත් කර තිබේ.

කථානායක ජගත් වික්‍රමරත්නගේ ප්‍රධානත්වයෙන් පසුගිය සිකුරාදා (ඔක්තෝබර් 31) පැවති රැස්වීමකදී, පොලිස්පතිවරයා තහවුරු කළේ පොලිස් ආරක්ෂාව සැපයීම මන්ත්‍රීවරුන් සහ පළාත් පාලන ආයතන නියෝජිතයන්ගේ ඉල්ලීම මත ස්වයංක්‍රීයව ලබාදෙන හිමිකමක් නොවන බවයි.

විධිමත් තර්ජන තක්සේරු ක්‍රියාවලියක් මත පොලිස් ආරක්ෂාව සැපයීම රඳා පවතී.

සියලුම මන්ත්‍රීවරුන්ට ඔවුන්ගේ ඉල්ලීම මත ආරක්ෂක නිලධාරීන් සැපයීමට පොලිසිය එකඟ වී ඇති බවට පවතින මතය පොලිස්පති වීරසූරිය ප්‍රතික්ෂේප කළේය.

“මාධ්‍ය වෙනම කතාවක් වාර්තා කරලා තියෙනවා කියලයි පේන්නේ, නමුත් අපි එම ප්‍රකාශයට එකඟ වෙන්නේ නැහැ. එය නිතැතින් ලැබෙන අයිතියක් නෙවෙයි. තම ආරක්ෂාව පිළිබඳ ගැටළුවක් ඇති සෑම පුද්ගලයකුම ඉල්ලීමක් කළ යුතුයි. තර්ජන තක්සේරුවක් මත පදනම්ව ආරක්ෂාව ලබා දෙනවා.” යනුවෙන් ඔහු පවසා ඇත.

පොලිස්පති වීරසූරියට අනුව, මහජන නියෝජිතයන්ට ආරක්ෂක නිලධාරීන් පැවරීමේ ක්‍රියාවලිය හුදෙක් ඉල්ලීමකට වඩා බුද්ධි අංශ විසින් මෙහෙයවනු ලබන දැඩි, නියම කරන ලද ක්‍රමවේදයක් අනුගමනය කරයි.

මෙම ක්‍රියාපටිපාටිය ආරම්භ වන්නේ පොලිසිය රැස්වීමක් කැඳවීමෙන් වන අතර, පසුව මූලික පරීක්ෂණයක් සහ බුද්ධි විමර්ශනයක් සිදු කරනු ලැබේ.

ඉන්පසු පොලිසිය විමර්ශනයේ දෙපාර්ශ්වයෙන්ම රැස් කරගත් තොරතුරු මත පදනම්ව විභව තර්ජනය තක්සේරු කිරීමට ඉදිරියට යයි.

ආරක්ෂක නිලධාරීන් සපයනු ලබන්නේ විශ්වාසදායක තර්ජනයක් තහවුරු වූ විට පමණි.

පොලිස්පතිවරයා පැහැදිලිවම ප්‍රකාශ කළේ “තර්ජනයක් නොමැති නම්, අපි කිසිදු පොලිස් නිලධාරියකු ලබා දෙන්නේ නැහැ.” යනුවෙනි.

ආරක්ෂක වෙන්කිරීම් දැඩි ලෙස බුද්ධි අංශ තොරතුරු මත පදනම් වන බවත් සරල ඉල්ලීමකට හෝ දේශපාලන තීරණවලට යටත් නොවන බවත් ඔහු තහවුරු කළේය.

සිකුරාදා සැසිවාරය කැඳවනු ලැබුවේ විපක්ෂයේ ප්‍රධාන සංවිධායක ගයන්ත කරුණාතිලකගේ නායකත්වයෙන් යුත් විපක්ෂයේ පක්ෂවල ඉල්ලීම පරිදිය.

වැලිගම ප්‍රාදේශීය සභාවේ සභාපති ලසන්ත වික්‍රමසේකරගේ මෑත ඝාතනයෙන් පසු මන්ත්‍රීවරුන්ගේ ආරක්ෂාව පිළිබඳ වැඩිවන ගැටළු විසඳීම සඳහා කථානායකවරයා සමඟ ඔවුන් රැස්වීමක් ඉල්ලා තිබිණි.

මූල්‍ය කප්පාදුව යටතේ නීති සම්පාදකයන් කිහිප දෙනෙකුගේ පෞද්ගලික ආරක්ෂාව අඩු කිරීමට හෝ ඉවත් කිරීමට රජය මීට පෙර ගත් තීරණය විපක්ෂය දැඩි ලෙස විවේචනය කර තිබේ.

ඉලංකෙයි තමිල් අරසු කච්චි (ITAK) පාර්ලිමේන්තු මන්ත්‍රී ශානකියන් රාජපුත්‍රිරන් රාසමානික්කම් තහවුරු කළේ ඔහුගේ ආරක්ෂාව නොවෙනස්ව පැවති බවත් ඔහු මන්ත්‍රීවරයකු නොවූ කාලය තුළ පවා එය ඉවත් නොකළ බවයි.

“ගෞරවය හිමිවිය යුතු තැන දිය යුතුයි – දේශපාලනඥයන් වශයෙන්, ප්‍රතිපත්තිමය කරුණු සම්බන්ධයෙන් අපට ගැටුම් ඇති විය හැකි නමුත්, ආරක්ෂාව සම්බන්ධයෙන් කිසිදු අඩුපාඩුවක් සිදුවී නැහැ. මගේ ජීවිතයට තර්ජන හේතුවෙන් මට ආරක්ෂාව දී තිබෙනවා. එම ආරක්ෂාව දැන් මන්ත්‍රීවරයකු සඳහා නිතැතින් ලැබෙන හිමිකමක් නෙවෙයි, තර්ජන තක්සේරුව මත පදනම් වනවා, ඒ නිසා මම දැනට දීලා තියෙන ආරක්ෂාව ගැන සෑහීමකට පත්වෙනවා,” යනුවෙන් ඔහු පැවසීය.

“කිසිම පුද්ගලයකුට විශේෂ සැළකිල්ලක් ලබා දෙන්නේ නැහැ. සෑම පුද්ගලයකුටම ආරක්ෂාව සඳහා අයදුම් කිරීමට සමාන අයිතියක් තිබෙනවා. අයදුම් කරන ඕනෑම පුද්ගලයකුට තර්ජන තක්සේරු කිරීමේ විධිවිධාන හරහා යා යුතුයි. ආරක්ෂාව ලබාදීමේ ඕනෑම තීරණයක් ගනු ලබන්නේ ඉන්පසුවයි.” යනුවෙන් පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යූ. වූට්ලර් පැවසීය.