සෑම පුරවැසියකුටම ආරක්ෂිත ජීවිතයක් සහතික කිරීම රජයේ අරමුණ බවත්, ජනතාව නැවත පදිංචි කිරීමේදී නිසි අධීක්ෂණයකින් කටයුතු කිරීම සැමගේ වගකීමක් බවත් ජනාධිපති අනුර කුමාර දිසානායක අවධාරණය කළේය.

මෙම වසරේ යටිතල පහසුකම් සංවර්ධනට රජය විසින් ලබා දී ඇති ප්‍රතිපාදන භාවිත කරමින් දෙසැම්බර් 31 වැනිදාට පෙර අවශ්‍ය සියලු අලුත්වැඩියා කටයුතු අවසන් කරන ලෙසත්, කිසිදු තත්වයක් යටතේ එම ප්‍රතිපාදනවලින් කොටසක් ආපසු නොඑවන ලෙසත් ජනාධිපතිවරයා අදාළ අංශවලට උපදෙස් දුන්නේය.

ජනතාවට සහන සැලසීමට සහ සාමාන්‍ය ජීවිතය යථා තත්ත්වයට පත් කිරීමට අවශ්‍ය අරමුදල් හිඟයක් නොමැති බවත්, මෙම හදිසි අවස්ථාවේදී අවශ්‍ය වන්නේ සියලු ආයතන සීමාවන් නොමැතිව නිසි සම්බන්ධීකරණයෙන් තම වගකීම් ඉටු කිරීම බවත් ජනාධිපතිවරයා පැවසීය.

බදුල්ල දිස්ත්‍රික්කයේ පීඩාවට පත් ජනතාවගේ ජීවිත යථා තත්ත්වයට පත් කිරීම සහ අත්‍යවශ්‍ය යටිතල පහසුකම් සංවර්ධනය කිරීම සඳහා ගෙන යන වැඩසටහන සමාලෝචනය කිරීම සඳහා ඊයේ (08) පස්වරුවේ ඌව පළාත් පුස්තකාල ශ්‍රවණාගාරයේ පැවති දිස්ත්‍රික් සම්බන්ධීකරණ කමිටු රැස්වීමට සහභාගී වෙමින් ජනාධිපති අනුර කුමාර දිසානායක මෙම අදහස් පළ කළේය.

ආපදා තත්ත්වය හේතුවෙන් බදුල්ල දිස්ත්‍රික්කයේ පවුල් 19,133කට අයත් පුද්ගලයන් 64,140ක් පීඩාවට පත්ව සිටිති.

නිවාස 418ක් සම්පූර්ණයෙන්ම හානි වී ඇති අතර නිවාස 7,703ක් අර්ධ වශයෙන් හානි වී ඇත.

හානියට පත් මාර්ග අලුත්වැඩියා කිරීම, විදුලිය, ජල සැපයුම, සන්නිවේදනය, වාරිමාර්ග, කෘෂිකර්මාන්තය නැවත ආරම්භ කිරීම, පශු සම්පත් අංශය, මිරිදිය ධීවර කර්මාන්තය සහ සෞඛ්‍ය හා අධ්‍යාපන අංශ යථා තත්ත්වයට පත් කිරීම ඇතුළු අත්‍යවශ්‍ය යටිතල පහසුකම් යථා තත්ත්වයට පත් කිරීම සඳහා ක්‍රියාත්මක වන වැඩසටහන් පිළිබඳ ජනාධිපතිවරයා වෙන වෙනම සොයා බැලීය.

මාර්ග සංවර්ධන අධිකාරිය යටතේ ඇති මාර්ග, පළාත් මාර්ග හෝ පළාත් පාලන මාර්ග ලෙස බෙදා නොගෙන සියලුම මාර්ග අලුත්වැඩියා එකවර සිදු කිරීමේ අවශ්‍යතාව ජනාධිපතිවරයා පෙන්වා දුන්නේය.

මේ සඳහා වෙන් කර ඇති අරමුදල් ප්‍රමාණවත් නොවේ නම්, අවශ්‍ය අමතර ප්‍රතිපාදන ඉල්ලා සිටිය යුතු බව ඔහු නිලධාරීන්ට දැනුම් දුන්නේය.

ස්ථිර අලුත්වැඩියාවක් අවශ්‍ය දිස්ත්‍රික්කයේ සියලුම මාර්ග සඳහා ඇස්තමේන්තුවක් සකස් කර ඉදිරිපත් කරන ලෙස ද ජනාධිපතිවරයා උපදෙස් දුන් අතර ජනවාරි මාසය වන විට මෙම කාර්යය ආරම්භ කිරීම සඳහා අරමුදල් ලබා දිය හැකි බව සඳහන් කළේය.

ආපදා තත්ත්වය හේතුවෙන් දිස්ත්‍රික්කයේ හානියට පත් විදුලි සැපයුමෙන් 90%ක් දැනටමත් යථා තත්ත්වයට පත් කර ඇති අතර ඉතිරි සැපයුම ද කඩිනමින් යථා තත්ත්වයට පත් කරමින් පවතින බව නිලධාරීහු පැවසූහ.

අවශ්‍ය පරිදි දිස්ත්‍රික්කයේ ජල සැපයුම ලබා දීමට පියවර ගෙන ඇති බව ඔවුහු තවදුරටත් පෙන්වා දුන්හ.

පාසල් නැවත විවෘත කිරීම පිළිබඳව ද සාකච්ඡා කළ අතර, බලපෑමට ලක් වූ පාසල් දරුවන්ට රජයෙන් ලබා දෙන රුපියල් 15,000ක දීමනාව ප්‍රාදේශීය ලේකම්වරුන්ගේ මැදිහත්වීම හරහා කඩිනමින් ගෙවන ලෙස ජනාධිපතිවරයා උපදෙස් දුන්නේය.

ආපදා තත්ත්වය හේතුවෙන් බදුල්ල දිස්ත්‍රික්කයේ කෘෂිකාර්මික ඉඩම් අක්කර 6,711ක් හානි වී ඇත.

අදාළ ගොවීන් සහ හානියට පත් ඉඩම් ප්‍රමාණය හඳුනාගෙන කඩිනමින් වන්දි ලබා දී ඔවුන් නැවත වගාවට යොමු කරන ලෙස ජනාධිපතිවරයා උපදෙස් දුන්නේය.

ගොවීන්ට මහ කන්නයේ අස්වැන්න නෙළා ගැනීමට හැකි වන පරිදි අවම වශයෙන් තාවකාලිකව හෝ කෘෂිකාර්මික ඉඩම්වලට ජලය ලබා දෙන ලෙස ඔහු වාරිමාර්ග දෙපාර්තමේන්තුවේ නිලධාරීන්ට තවදුරටත් උපදෙස් දුන්නේය.

හානියට පත් විහාරස්ථාන සහ ආගමික ස්ථාන පිරිසිදු කිරීම සහ ප්‍රතිසංස්කරණය කිරීම සඳහා ලබා දෙන රුපියල් 25,000ක ප්‍රතිපාදන සංස්කෘතික කටයුතු දෙපාර්තමේන්තුව හරහා ලබා දෙන අතර මේ සම්බන්ධයෙන් කැබිනට් තීරණයක් මෙම සතියේ දී අපේක්ෂා කෙරේ.

විනාශ වූ සහ හානි වූ නිවාස සඳහා වන්දි ලබා දීම සහ පීඩාවට පත් ජනතාව නැවත පදිංචි කිරීම පිළිබඳව දීර්ඝ සාකච්ඡා පැවැත්විණි.

කඳවුරුවල ජීවත්වන ජනතාවගේ මානසික සෞඛ්‍යය වැඩිදියුණු කිරීම අරමුණු කරගත් වැඩසටහන් ක්‍රියාත්මක කිරීමේ අවශ්‍යතාව ද ජනාධිපතිවරයා අවධාරණය කළේය.

මෙම අවස්ථාවේදී, ජනාධිපති අනුර කුමාර දිසානායක මෙම සියලු කටයුතුවලදී ඉමහත් කැපවීමකින් කටයුතු කරන ත්‍රිවිධ හමුදාවට, රජයේ නිලධාරීන්ට සහ මහජනතාවට සිය කෘතඥතාව පළ කළේය.