කුරුක්කල්මඩම් සමූහ මිනීවළ කැණීම සඳහා සංශෝධිත කෙටුම්පත් සැලැස්මක් ඉදිරිපත් කරන ලෙස කළුවන්චිකුඩි මහේස්ත්‍රාත් අධිකරණය ඊයේ (21) කොළඹ උපදේශක අධිකරණ වෛද්‍ය නිලධාරියාට(CJMO) නියෝගයක් නිකුත් කළේය.

1990.07.12 වන දින හජ් වන්දනාව අවසන් කර නිවසට යමින් සිටි වන්දනාකරුවන් සහ වෙළඳුන් පැහැරගෙන යෑම, බලහත්කාරයෙන් අතුරුදහන් කිරීම සහ ඝාතනය කර භූමදාන කිරීම සම්බන්ධ නඩුව අධිකරණය හමුවේ කැඳවූ අවස්ථාවේදී මෙම නියෝගය නිකුත් කරන ලදී.

නීතිපතිවරයාට, අතුරුදහන් වූවන් පිළිබඳ කාර්යාලයට සහ කලවන්චිකුඩි පොලිස් ස්ථානයේ ස්ථානාධිපතිට අධිකරණය හමුවේ පෙනී සිටින ලෙස පෙර නඩු විභාගයේදී මහේස්ත්‍රාත්වරයා සිතාසි නිකුත් කර තිබිණි.

ඊට අනුකූලව, අතුරුදහන් වූවන් පිළිබඳ කාර්යාලයේ නීති නියෝජිතයන් සහ ස්ථානාධිපතිවරයා ඊයේ අධිකරණයට පැමිණ සිටියහ.

කෙසේවෙතත්, නීතිපති දෙපාර්තමේන්තුව වෙනුවෙන් කිසිවකු පෙනී සිටියේ නැත.

අතුරුදන් වූවන් පිළිබඳ කාර්යාලය නියෝජනය කරන නීතිඥවරයා අධිකරණයට කරුණු දක්වමින්, කුරුක්කල්මඩම් සමූහ මිනීවළ නිසි ලෙස කැණීම් කළ යුතු බවට කාර්යාලය සිය ස්ථාවරය දිගටම පවත්වාගෙන යන බව පැවසීය.

කුරුක්කල්මඩම් හි සැක සහිත ස්ථානය කැණීම් කිරීමට අධිකරණය නියෝගයක් ලබා දෙන්නේ නම්, නිරීක්ෂකයන් ලෙස කටයුතු කිරීමට තම කාර්යාලය සූදානම් බව නීතිඥවරයා තවදුරටත් ඉදිරිපත් කළේය.

එම ඉදිරිපත් කිරීම සැළකිල්ලට ගත් මහේස්ත්‍රාත්වරයා, කුරුක්කල්මඩම් සමූහ මිනීවළ කැණීම් කිරීම සඳහා සංශෝධිත කෙටුම්පත් සැලැස්මක් ඉදිරිපත් කරන ලෙස කොළඹ උපදේශක අධිකරණ වෛද්‍ය නිලධාරි වෙත නියෝග කළේය.

තවද, ඊළඟ නඩු විභාගයේදී පෙනී සිටින ලෙස අධිකරණය නීතිපතිවරයාට නියෝග කළේය.

පැමිණිලිකරු වන අබ්දුල් මජීඩ් රවුෆ් වෙනුවෙන්, හඬ ව්‍යාපාරයේ සභාපති නීතිඥ මුහයිමීන් කාලිඩ්, මුබාරක් මුආසාම්, හසන් රුස්දි, එස්.එම්. මනාර්දීන්, එෆ්.එච්.ඒ. අම්ජාඩ් සහ ඒ.එල්. අසාත් ඇතුළු නීතිඥ කණ්ඩායමක් පෙනී සිටියහ.

කුරුක්කල්මඩම් සමූහ මිනීවළේ වින්දිතයන්ට යුක්තිය සහතික කිරීම සඳහා හඬ ව්‍යාපාරය අතීතයේ දී අඛණ්ඩව කටයුතු කර ඇත.